കൊണ്ടാഴി: ഗ്രാമ പഞ്ചായത്ത് വൈസ് പ്രസിഡണ്ട് പി.ആര് വിശ്വനാഥനെതിരെ കോണ്ഗ്രസ് നല്കിയ അവിശ്വാസ പ്രമേയം വെള്ളിയാഴ്ച്ച അവതരിപ്പിക്കും. 15 അംഗ ഭരണസമിതിയില് കോണ്ഗ്രസിനും എല് ഡി എഫിനും 7 വീതവും ബിജെപിക്ക് ഒരംഗവുമാണുള്ളത് . ബി ജെ പി അംഗം വിട്ടു നിന്നതുമൂലം നറുക്കെടുപ്പിലൂടെയാണ് പ്രസിഡണ്ടായി കോണ്ഗ്രസ്സിലെ ആര്.ശ്രീദേവിയും വൈസ് പ്രസിഡണ്ടായി സി പി ഐ യിലെ പി.ആര് വിശ്വനാഥനും തിരഞ്ഞെടുക്കപ്പെട്ടത്.
പഞ്ചായത്ത് പ്രസിഡണ്ട് ശ്രീദേവിക്കെതിരെ മാസങ്ങള്ക്കു മുന്പ് എല്ഡിഎഫ് അവിശ്വാസ പ്രമേയാവതരണത്തിനു ശ്രമിച്ചെങ്കിലും പരാജയപ്പെട്ടിരുന്നു.
എന്നാല് ഈ അവിശ്വാസം ജനങ്ങള്ക്കിടയില് പുകമറയുണ്ടാക്കാന് വേണ്ടിയാണെന്നും, പഞ്ചായത്തിലെ ഭരണ പരാജയവും അഴിമതിയും ജനങ്ങള് മനസ്സിലാക്കി തുടങ്ങിയതിനാല് ജനങ്ങളുടെ ശ്രദ്ധ തിരിക്കാന് വേണ്ടിയാണ് 6 മാസം കൂടുമ്പോള് പരസ്പരം അവിശ്വാസം കൊണ്ടു വരുന്നതെന്നും ബി ജെ പി കൊണ്ടാഴി പഞ്ചായത്ത് പ്രസിഡണ്ട് വിജിത്ത് വാരിയര് പറഞ്ഞു.
ദിവസങ്ങള്ക്കു മുന്പ് സി പി ഐ യിലെ അംഗമായ വൈസ് പ്രസിഡണ്ട് പി.ആര് വിശ്വനാഥനെതിരെ നിലനിന്നിരുന്ന കേസില് ജാമ്യത്തിനായി കോണ്ഗ്രസ് അംഗമായ പഞ്ചായത്ത് പ്രസിഡണ്ട് ആര്.ശ്രീദേവി സ്റ്റേഷനിലെത്തിയത് വന് വിവാദമായിരുന്നു.
