തൃക്കണ്ണാട്: ദക്ഷിണ കാശിയെന്നറിയപ്പെടുന്ന തൃക്കണ്ണാട് തൃയംബകേശ്വര ക്ഷേത്രത്തില് കര്ക്കിടകവാവ് ദിവസമായ ഇന്നലെ ബലിതര്പ്പണം ചെയ്യാന് പതിനായിരങ്ങളെത്തി. വിപുലമായ ഒരുക്കങ്ങളാണ് ബലിതര്പ്പണത്തിനായി ഇത്തവണ ക്ഷേത്രത്തിന് മുന്നിലുള്ള കടലോരത്ത് ഒരുക്കിയിരുന്നത്. ഒരേസമയം 300 പേര്ക്ക് ബലിതര്പ്പണം ചെയ്യാവുന്ന തരത്തിലാണ് പന്തല് നിര്മ്മിച്ചിരുന്നത്. രസീത് നല്കാന് 10 കൗണ്ടറുകളാണ് ഒരുക്കിയിരുന്നത്. ദിസങ്ങള്ക്ക് മുമ്പെ കൗണ്ടറുകളില് നിന്ന് രശീത് നല്കി തുടങ്ങിയതിനാല് തിരക്കൊഴിവാക്കാന് സാധിച്ചു.
ഇന്നലെ രാവിലെ 5 മണിക്ക് ക്ഷേത്ര മേല്ശാന്തി നവീന് കാര്യത്തായയുടെ നേതൃത്വത്തില് ക്ഷേത്രത്തിലെ നിത്യപൂജകള് നടന്നു. തുടര്ന്ന് ക്ഷേത്രത്തിലെ പുരോഹിതന് രാജേന്ദ്രന് അരളിത്തായയുടെ നേതൃത്വത്തില് 20 പുരോഹിതര് പിതൃതര്പ്പണത്തിന് കാര്മികത്വം വഹിച്ചു.
ബലിതര്പ്പണം നടത്താന് ക്ഷേത്രത്തില്ലെത്തിയവര് കുളിച്ച് ഈറനോടെ ക്ഷേത്ര നടയില് കാണിക്കയിട്ട് മേല്ശാന്തിയില് നിന്ന് അരിയും പൂവും വാങ്ങിച്ചു. തുടര്ന്ന് കടലോരത്തെ ബലിത്തറയില് ബലികര്മ്മം നടത്തി. പിണ്ഡം കടലില് ഒഴുക്കിയ ശേഷം വീണ്ടും കുളിച്ച് ക്ഷേത്രത്തില് നടയിലെത്തി ത്രയംബകേശ്വരനെ വണങ്ങി തീര്ത്ഥവും പ്രസാദവും സ്വീകരിച്ച് പിതൃമോഷത്തിനായി പ്രാര്ത്ഥിച്ച് സായൂജ്യമേകി മടങ്ങി. ജില്ലക്ക് പുറത്തു നിന്നും അന്യസംസ്ഥാനങ്ങളില് നിന്നും നിരവധി പേരാണ് പിതൃ മോഷകര്മ്മങ്ങള്ക്കായി ക്ഷേത്രത്തിലെത്തിയത്. വന്തിരക്ക് കണക്കിലെടുത്ത് സുരക്ഷയ്ക്കായി പോലീസിനേയും കോസ്റ്റ്ഗാര്ഡിനേയും വിന്യസിച്ചിരുന്നു.
