കൊഴിഞ്ഞാമ്പാറ: വിദേശമദ്യം കഴിച്ച് അവശനിലയില് ചികിത്സയിലായിരുന്ന നാലുപേരില് ഒരാള് മരിച്ചു.
അഞ്ചാം മൈല് പഴണി സ്വാമിയുടെ മകന് കാര്ത്തികേയന് (36) ആണ് ചികിത്സയ്ക്കിടെ മരിച്ചത്. കൊഴിഞ്ഞാമ്പാറ പെരുമ്പാറച്ചുള്ള കളിയപ്പന് മകന് ആനന്ദ് (36), മണിമുത്തു നഗര് മുത്തുസ്വാമി മകന് ജഗദീഷ് (36), ഗോപാലപുരം താവളം ആറുമുഖന് മകന് മുരുകന് (40), എന്നിവര് അത്യാഹിത നിലയില് ചികിത്സയിലാണ്.
വ്യാഴാഴ്ച്ച ഉച്ചയോടെ മേനോന്പറയിലെ വിദേശമദ്യശാലയില് നിന്നും അരലിറ്ററിന്റെ മദ്യംവാങ്ങിയതായാണ് പോലീസിന് നല്കിയ മൊഴി.മദ്യത്തിന്റെ വീര്യം കൂട്ടാന് പെയിന്റില് ചേര്ക്കുന്ന ടിന്നര് കലര്ത്തിയാണ് മദ്യപിച്ചതെന്നും സൂചനയുണ്ടെന്ന് പോലീസ് പറഞ്ഞു.
ആനന്ദ് വീട്ടില്വെച്ചായിരുന്നു മദ്യംകഴിച്ചത്. കുപ്പിയില് ബാക്കിയുണ്ടായിരുന്ന മദ്യം അടുത്തദിവസം രാവിലെ വീട്ടിലെത്തിയ സുഹൃത്തുക്കളായ മറ്റു മൂന്നു പേരും കഴിച്ചതായാണ് മൊഴി.
ഇവര്ക്ക് ദേഹാസ്വസ്ത്യം അനുഭവപ്പെട്ടപ്പോഴാണ് ആനന്ദ് അബോധാവസ്ഥയിലാണെന്ന് അറിയുന്നത്.ഉടന് ഇവരെ ആശുപത്രിയില് എത്തിക്കുകയായിരുന്നു.ഇവരുടെ മൊഴി പോലീസിന് പൂര്ണ്ണമായി ലഭിച്ചില്ലെന്നും അന്വേഷണത്തിന് ശേഷമാത്രമെ നിഗമനത്തിലെത്താന് കഴിയുവെന്ന് കൊഴിഞ്ഞാമ്പാറ എസ്ഐ എസ്.സജികുമാര് അറിയിച്ചു.
ഗുരുതരാവസ്ഥയിലായ മറ്റു മൂന്നു പേരും തൃശ്ശൂര് മെഡിക്കല് കോളജ് ആശുപത്രിയിലാണ്. ഈശ്വരിയാണ് മരിച്ച ജഗദീഷിന്റെ അമ്മ.സഹോദരങ്ങള്: അംശവേണി, മീനാക്ഷി.
