അമ്പലപ്പുഴ: ഗവ: മോഡല് ഹയര് സെക്കന്ഡറി സ്ക്കൂളില് ഉച്ചഭക്ഷണ വിതരണത്തില് ക്രമക്കേട് ഉണ്ടെന്ന പരാതിയെ തുടര്ന്ന് വിജിലന്സിന്റെ പ്രാഥമിക അന്വേഷണം പൂര്ത്തിയാക്കി. തുടര് നടപടികള്ക്കായി റിപ്പോര്ട്ട് വിജിലന്സ് ഡയറക്ടര്ക്ക് കൈമാറി.
ഒരാഴ്ച മുമ്പാണ് വിജിലന്സ് ഡയറക്ടര്ക്ക് റിപ്പോര്ട്ട് കൈമാറിയത്. പരാതി സംബന്ധിച്ച് നിരവധി പേരില് നിന്ന് മൊഴി ശേഖരിച്ചിരുന്നു. പ്രാഥമിക അന്വേഷണത്തില് ഉച്ചഭക്ഷണ വിതരണത്തില് ക്രമക്കേട് നടന്നതായി വിജിലന്സിന് ബോദ്ധ്യപ്പെട്ടിട്ടുണ്ട്.
വിജിലന്സ് ഡയറക്ടറുടെ അനുമതിക്കു ശേഷം ഇതില് കേസെടുത്ത് തുടരന്വഷണം നടത്താനാണ് വിജിലന്സിന്റെ നീക്കം. മനുഷ്യവകാശ പ്രവര്ത്തകനായ കാക്കാഴം താഴ്ചയില് നസീര് നല്കിയ പരാതിയെ തുടര്ന്നാണ് വിജിലന്സ് അന്വേഷണം. പാല്, മുട്ട, എന്നിവ കൂടാതെ വിദ്യാര്ത്ഥികള്ക്കു നല്കുന്ന ഭക്ഷണത്തിലും വ്യാപക ക്രമക്കേടാണ് നടത്തിയത്.
ഇത് സംബന്ധിച്ച് ലഭിച്ച വിവരാവകാശ മറുപടിയില് സ്ക്കൂള് അധികൃതര് സമര്പ്പിച്ച ബില്ലുകള് കെട്ടിചമച്ചതാണന്നും തെളിഞ്ഞിട്ടുണ്ട്. 506 വിദ്യാര്ത്ഥികള്ക്ക് പതിവായി ഉച്ചഭക്ഷണം നല്കുന്നുണ്ടന്നാണ് വിവരാവകാശ മറുപടിയില് പറയുന്നത്. എന്നാല് 200ല് താഴെ കുട്ടികള് മാത്രമാണ് ഉച്ചഭക്ഷണം കഴിക്കുന്നത്. മറ്റ് കുട്ടികള്ക്കും ഉച്ചഭക്ഷണം നല്കുന്നുണ്ടെന്ന വ്യാജ കണക്കാണ് സ്ക്കൂള് അധികൃതര് നല്കിയിരിക്കുന്നത്.
