ആലപ്പുഴ: തണ്ണീര്മുക്കം ബണ്ടിന്റെ മൂന്നാംഘട്ട പ്രവര്ത്തനങ്ങള് അടിയന്തരമായി പൂര്ത്തീകരിക്കുന്നതിനായി വെച്ചൂര്, തണ്ണീര്മുക്കം ഗ്രാമപഞ്ചായത്തിലെ ജനപ്രതിനിധികളുടെയും രാഷ്ട്രീയകക്ഷി പ്രതിനിധികളുടെയും മത്സ്യത്തൊഴിലാളി സംഘടനകളുടെയും യോഗം വിളിക്കുമെന്ന് മന്ത്രി പി. തിലോത്തമന്.
തണ്ണീര്മുക്കം ബണ്ടിന്റെ മൂന്നാംഘട്ട നിര്മാണപ്രവര്ത്തനങ്ങള് തടസപ്പെട്ടതിനെത്തുടര്ന്ന് പ്രശ്നപരിഹാരത്തിനായി വിളിച്ചുചേര്ത്ത യോഗത്തില് ആധ്യക്ഷ്യം വഹിക്കുകയായിരുന്നു മന്ത്രി.
181 കോടി രൂപ ചെലവിലുള്ള ബണ്ടിന്റെ മൂന്നാംഘട്ട നിര്മാണ പ്രവൃത്തികള് 78 ശതമാനം പൂര്ത്തീകരിച്ചു. നിര്മാണം പൂര്ത്തീകരിക്കുന്നതോടെ നിലവില് കിഴക്കു പടിഞ്ഞാറായി ഗതാഗതത്തിന് ഉപയോഗിക്കുന്ന 450 മീറ്ററോളംവരുന്ന മണ്ചിറ മാറ്റി ഒഴുക്കു പുനസ്ഥാപിക്കുകയാണ് പദ്ധതിയിലൂടെ ഉദ്ദേശിക്കുന്നത്.
ബണ്ടിന്റെ സുരക്ഷയുമായി ബന്ധപ്പെട്ട് നിലനിര്ത്തേണ്ട നൂറുമീറ്ററോളം വരുന്ന മണ്ചിറ നീരൊഴുക്കിനെ ബാധിക്കില്ലെന്ന് മന്ത്രി പറഞ്ഞു. തണ്ണീര്മുക്കം ബണ്ടിന്റെ മൊത്തം നീളം 1,410 മീറ്ററാണ്.
