ജെറുസലേം: സൈബർ സുരക്ഷയെപ്പറ്റിയുള്ള കാര്യങ്ങളായിരിക്കും പ്രധാനമന്ത്രി നരേന്ദ്ര മോദിയുടെ സന്ദർശന വേളയിൽ കൂടുതൽ ചർച്ചാ വിഷയമാകുന്നതെന്ന് ഇസ്രേയൽ പ്രധാനമന്ത്രി ബെഞ്ചമിൻ നെതന്യാഹു. ടെൽ അൽ വിവ് യൂണിവേഴ്സിറ്റിയിൽ നടന്ന ‘സൈബർ വീക്ക് 2017’ സമ്മേളനത്തിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
ലോകത്തെ ഏറ്റവും പ്രാധാന്യമുള്ള പ്രധാനമന്ത്രിയാണ് മോദി. അദ്ദേഹം ഇസ്രേയലുമായി പല മേഖലകളിലും മികച്ച ബന്ധം ആഗ്രഹിക്കുന്നു. പ്രധാനമായും ഇസ്രേയലുമായി സൈബർ മേഖലയിൽ കൂടുതൽ സഹകരണമുണ്ടാകാൻ ഇന്ത്യ ആഗ്രഹിക്കുന്നുണ്ട്- നെതന്യാഹു പറഞ്ഞു. ലോകത്തെ മൂന്നാമത്തെ സാമ്പത്തിക ശക്തിയായി ഇന്ത്യ വികസിക്കുകയാണെന്നും അദ്ദേഹം കൂട്ടിച്ചേർത്തു.
ജലം, കൃഷി, ആരോഗ്യം തുടങ്ങി നിരവധി മേഖലകളിലും ഇരു രാജ്യങ്ങളും തമ്മിൽ പരസ്പര സഹകരണമാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. ജൂലൈ നാലിനാണ് പ്രധാനമന്ത്രിയുടെ ഇസ്രേയൽ സന്ദർശനം തുടങ്ങുന്നത്.
