പള്ളിപ്പുറം: ചേന്നം പള്ളിപ്പുറം ഗ്രാമപഞ്ചായത്തിലുണ്ടായ മോഷണപരമ്പരയുമായി ബന്ധപ്പെട്ട് പോലീസ് അന്വേഷണം ജില്ലക്ക് പുറത്തേക്കും. സമീപജില്ലകളായ എറണാകുളം, കൊല്ലം എന്നവിടങ്ങളിലെ പ്രൊഫഷണല് മോഷ്ടാക്കളെ കേന്ദ്രീകരിച്ചാണ് ഇപ്പോഴത്തെ അന്വേഷണം.
പള്ളിപ്പുറത്ത് സംഭവം നടക്കുമ്പോള് ഇത്തരത്തില് സംശയിക്കുന്നവര് ആരെങ്കിലും ഇവിടെ വന്നിരുന്നോ, ഫോണില് ആരെയെങ്കിലും ബന്ധപ്പെട്ടിരുന്നോ തുടങ്ങിയ കാര്യങ്ങളുമാണ് അന്വേഷിക്കുന്നത്. ഇതിനായി പ്രത്യേകം ഉദ്യോഗസ്ഥരെ ചുമതലപ്പെടുത്തി.
ഞായറാഴ്ച പുലര്ച്ചെയാണ് നാല് വീടുകളില് മോഷണവും 16 വീടുകളില് മോഷണ ശ്രമവും നടന്നത്.കമ്പിപ്പാര, കരിങ്കല് എന്നിവ ഉപയോഗിച്ച് വീടുകളുടെ വാതിലും ജനലും ഇളക്കിയായിരുന്നു മോഷണ പരമ്പര. മോഷണം നടന്ന ദിവസം നാട്ടുകാരില് ചിലര് മോഷ്ടാക്കളെ കണ്ടെന്ന സൂചനകള് പൊലീസിനു നല്കിയിട്ടുണ്ട്.
ഇത് കേന്ദ്രീകരിച്ചും അന്വേഷണം പുരോഗമിക്കുകയാണ്. ഇതിനിടെ ചേര്ത്തല പോലീസ് രാത്രി കാല പട്രോളിങ് ശക്തമാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: