എരുമേലി: വെണ്കുറിഞ്ഞി സര്വീസ് സഹകരണ ബാങ്ക് സഹകരണനിയമം ലംഘിച്ചതായി പരിശോധനാ റിപ്പോര്ട്ട്. കേരള സഹകരണ നിയമചട്ടം ലംഘിച്ചതായി സഹകരണ സംഘം ഇന്സ്പെക്ടര് നടത്തിയ പരിശോധനയിലാണ് കണ്ടെത്തിയിരിക്കുന്നത്.
പൊതുപ്രവര്ത്തകന് മുക്കൂട്ടുതറ ദിലീപ് മാത്യു നല്കിയ പരാതിയെ തുടര്ന്നാണ് അന്വേഷണം നടന്നത്. 2015 മാര്ച്ച് 31ലെ കണക്കുപ്രകാരം മൂലധനത്തില് 1,94,75,030 രൂപയുടെ കുറവാണ് കണ്ടെത്തിയിരിക്കുന്നത്. നിയമനം, നിര്മാണം, മൂലധനം സൂക്ഷിക്കല് തുടങ്ങിയ വിഷയങ്ങളിലാണ് നിയമലംഘനം നടന്നിരിക്കുന്നത്.
നിക്ഷേപങ്ങള് സ്വീകരിക്കുന്ന സഹകരണ സംഘങ്ങള് മിതമായി സൂക്ഷിക്കേണ്ട നിരക്കു സംബന്ധിച്ചുള്ള സഹകരണ ചട്ടത്തിന്റെ ലംഘനമാണിതെന്നു പരിശോധനാ റിപ്പോര്ട്ടില് പറയുന്നു.
2006 മുതല് 2015 വരെ അപേക്ഷയോ ഭരണസമിതി തീരുമാനമോ, സര്വീസ് ബുക്കില് രേഖപ്പെടുത്തലോ ഇല്ലാതെ ഏണ്ഡ് ലീവ് ഇനത്തില് 24.76 ലക്ഷം രൂപ പിന്വലിച്ചതായി പരിശോധനയില് കണ്ടെത്തി. ഇതും സഹകരണ ചട്ട ലംഘനമാണെന്നു റിപ്പോര്ട്ടില് ചൂണ്ടിക്കാട്ടി. ബാങ്കില് നടന്ന പ്യൂണ് നിയമനത്തിലും പൊരുത്തക്കേടുകള് കണ്ടതായി റിപ്പോര്ട്ടില് പറയുന്നു.
