മയ്യില്: കൊളച്ചേരി പഞ്ചായത്ത് പ്രസിഡണ്ടിന്റെ രാജി ലീഗിനകത്തെ ഗ്രൂപ്പുപോരിന്റെ തുടര്ച്ച. പഞ്ചായത്തില് അകാരണമായി സൃഷ്ടിച്ചിരിക്കുന്ന ഭരണപ്രതിസന്ധി ജനങ്ങളോടുള്ള വഞ്ചനയെന്ന് ബിജെപി. കാലങ്ങളായി മേഖലയില് മുസ്ലീം ലീഗിനകത്ത് ഉരുണ്ടുകൂടിക്കൊണ്ടിരിക്കുന്ന ഗ്രൂപ്പുപോര് പ്രസിഡണ്ടിന്റെ രാജിയോടെ മറനീക്കി പുറത്തുവന്നിരിക്കുകയാണ്.
2015ല് ലീഗ് അംഗം കെ.സി.പി.ഫൗസിയയെ പ്രസിഡണ്ടായി തെരഞ്ഞെടുത്ത ഘട്ടത്തില് തന്നെ ലീഗില് അഭിപ്രായ ഭിന്നതയുണ്ടായിരുന്നു. സത്യപ്രതിജ്ഞാച്ചടങ്ങ് ലീഗിലെ ഒരുവിഭാഗം ബഹിഷ്കരിച്ചിരുന്നു. എട്ടംഗങ്ങളുള്ള മുസ്സീംലീഗിലെ മറ്റുചിലരെ പ്രസിഡണ്ട് സ്ഥാനത്തേക്ക് ഒരുവിഭാഗം നിര്ദ്ദേശിച്ചിരുന്നെങ്കിലും വടംവലി ശക്തമായതോടെ ഫൗസിയയെ പ്രസിഡണ്ടാക്കുകയായിരുന്നു. എന്നാല് പിന്നീട് ലീഗിനകത്തുള്ളവര്തന്നെ ഫൗസിയയെ തള്ളിപ്പറയുകയും ഒരുവിഭാഗം ഫൗസിയയെ മുന്നില് നിര്ത്തി പഞ്ചായത്ത് ഭരണത്തെ പിന്സീറ്റിലിരുന്ന് നിയന്ത്രിക്കുകയായിരുന്നു.
ഏറ്റവുമൊടുവില് ഒരുവിഭാഗത്തിന്റെ ഇംഗിതത്തിനനുസരിച്ച് പ്രവര്ത്തിക്കാത്തതിന്റെ പേരിലുണ്ടായ നിരന്തര സമ്മര്ദ്ദത്തിന്റെ ഫലമായാണ് ഫൗസിയക്ക് പ്രസിഡണ്ട് സ്ഥാനം നഷ്ടമായിരിക്കുന്നത്. പഞ്ചായത്തംഗങ്ങളായ ലീഗ് മെമ്പര്മാര് ഗ്രൂപ്പ് പോരിന്റെ പേരില് പരസ്പരം സംസാരിക്കാറുപോലുമില്ലെന്ന് നാട്ടുകാര് ചൂണ്ടിക്കാട്ടുന്നു.
അസുഖം കാരണം മാറിനിന്നതാണെന്നും മറ്റുമുള്ള കുപ്രചരണങ്ങളാണ് ലീഗ് ജില്ലാ-പ്രാദേശിക നേതൃത്വങ്ങള് പ്രചരിപ്പിക്കുന്നത്. എന്നാല് പഞ്ചായത്തിലെ പ്രവര്ത്തനങ്ങള്ക്ക് പാര്ട്ടി സഹകരിക്കാത്തതാണ് രാജിയിലേക്ക് നയിച്ചതെന്ന് ഫൗസിയ വ്യക്തമാക്കിയിട്ടുണ്ട്. ഉദ്യോഗസ്ഥരുടെ നിസ്സഹകരണമാണ് രാജിക്ക് കാരണമെന്ന പ്രചരണം അടിസ്ഥാനരഹിതമാണെന്ന് നാട്ടുകാര് പറയുന്നു. ഉദ്യോഗസ്ഥരെക്കൊണ്ട് കഴിഞ്ഞ കാലങ്ങളില് നേതാക്കളുടെ ഇംഗിതത്തിനനുസരിച്ച് എല്ലാം ചെയ്യിച്ചതായും പറയപ്പെടുന്നു.
സിപിഎമ്മിന് അഞ്ചും കോണ്ഗ്രസിന് മൂന്നും പ്രതിനിധികള് ഉണ്ടെങ്കിലും പ്രതിപക്ഷത്തെ മുഖ്യ കക്ഷികളായ ഇവര് മുസ്ലീം ലീഗിന്റെ താന്തോന്നിത്തതിനെതിരെ ഇന്നുവരെ പ്രതികരിക്കാന് തയ്യാറായിട്ടില്ലെന്ന് നാട്ടുകാര് പറയുന്നു. അതേ സമയം ഒരംഗം മാത്രമുള്ള ബിജെപി മാത്രമാണ് കൊളച്ചേരി പഞ്ചായത്തിലുണ്ടായിരിക്കുന്ന ഭരണപ്രതിസന്ധിക്കെതിരെ പ്രതികരിച്ചുവരുന്നത്.
