വയനാട് : സുല്ത്താന് ബത്തേരി സ്വദേശിയായ ഹേമചന്ദ്രനെ കൊലപ്പെടുത്തിയ കേസില് ഒളിവില് കഴിഞ്ഞിരുന്ന പ്രതി പിടിയില്. കണ്ണൂര് സ്വദേശി ലീബയാണ് കോഴിക്കോട് വിമാനത്താവളത്തില് വച്ച് പിടിയിലായത്. കോഴിക്കോട് മെഡിക്കല് കോളേജ് പൊലീസ് സ്റ്റേഷനില് എത്തിച്ച പ്രതി പൊലീസിനോട് തട്ടിക്കയറി.
കേസിലെ ആറ് പ്രതികളില് 5 പേര് നേരത്തെ പിടിയിലായിരുന്നു. വനത്തില് കുഴിച്ച് മൂടിയ നിലയായിരുന്നു ഹേമചന്ദ്രനെ കണ്ടെത്തിയത്.
അജേഷ്, ജ്യോതിഷ്, വൈശാഖ്, മെല്ബിന് മാത്യു, ലിബ, നൗഷാദ് എന്നിവരാണ് കേസിലെ പ്രതികള്. കേസില് പൊലീസ് കുറ്റപത്രം സമര്പ്പിച്ചിരുന്നു. 2024 മാര്ച്ചിലാണ് ഹേമചന്ദ്രനെ കോഴിക്കോട്ടെ മായനാട്ടെ വാടക വീട്ടില് നിന്ന് കാണാതാവുന്നത്.കുടുംബം പരാതി നല്കിയത് പ്രകാരം നടത്തിയ വിശദമായ അന്വേഷണത്തിലാണ് ചേരമ്പാടി വനത്തില് കുഴിച്ചിട്ട നിലയില് ഹേമചന്ദ്രന്റെ മൃതദേഹം കണ്ടെത്തിയത്.ഡിഎന്എ പരിശോധനയിലൂടെയാണ് മൃതദേഹ അവശിഷ്ടം ഹേമചന്ദ്രന്റേതെന്ന് തന്നെയെന്ന് തിരിച്ചറിഞ്ഞത്.
സാമ്പത്തിക ഇടപാടുമായി ബന്ധപ്പെട്ടാണ് ഹേമചന്ദ്രനെ തട്ടിക്കൊണ്ടുപോയി മര്ദിച്ച് കൊലപ്പെടുത്തിയത്. ക്രൂര മര്ദ്ദനത്തിന് ശേഷം കഴുത്തുഞെരിച്ച് കൊലപ്പെടുത്തിയെന്നായിരുന്നു പോസ്റ്റുമോര്ട്ടം റിപ്പോര്ട്ട്. എന്നാല് ഹേമചന്ദ്രന് തൂങ്ങിമരിച്ചതാണെന്നും അങ്ങനെ കണ്ടപ്പോള് മൃതദേഹം കുഴിച്ചിടുക മാത്രമാണ് ചെയ്തതെന്നായിരുന്നു മുഖ്യപ്രതി നൗഷാദിന്റെ ആദ്യമൊഴി. എന്നാല് ഹേമചന്ദ്രനെ കൊലപ്പെടുത്തിയത് നൗഷാദിന്റെ നേതൃത്വത്തില് തന്നെയെന്ന് പൊലീസ് കണ്ടെത്തി.
Main
