കാഞ്ഞങ്ങാട്: സിപിഎം ഓഫീസിലേക്ക് പതിമൂന്ന് ലക്ഷം രൂപ ചെലവഴിച്ചുള്ള റോഡുഡു നിര്മ്മാണത്തെ ചൊല്ലി ഇന്ന് നടക്കുന്ന നീലേശ്വരം മുനിസിപ്പല് കൗണ്സില് യോഗത്തില് ബഹളത്തിന് സാധ്യത. പ്രതിപക്ഷ കൗണ്സിലര്മാര് ഇക്കാര്യം യോഗത്തില് ശക്തമായി ഉന്നയിക്കുമെന്ന് വ്യക്തമാക്കി.
യുഡിഎഫ് പ്രതിനിധീകരിക്കുന്ന രണ്ട്, മൂന്ന് വാര്ഡുകളിലൂടെ കടന്നു പോകുന്ന റോഡ് സ്ഥലത്തെ കൗണ്സിലര്മാരോട് പോലും ചര്ച്ച ചെയ്യാതെയാണ് നിര്മ്മാണ പ്രവര്ത്തി ആരംഭിച്ചത്. റോഡു നിര്മ്മാണത്തില് ക്രമക്കേടും അപാകതകളും ഉള്ളതായി പ്രതിപക്ഷം ആരോപിക്കുന്നു.
നീലേശ്വരം രാജാറോഡില് രാജാസ് ക്ലിനിക്കില് നിന്നും സിപിഎം ലോക്കല് കമ്മറ്റി ഓഫീസായ എന് ജി സ്മാരക മന്ദിരത്തിലേക്കുള്ള റോഡ് വീതികൂട്ടി കോണ്ക്രീറ്റ് ചെയ്യാനുള്ള പൊതുമരാമത്തിന്റെ തിരക്കിട്ട തീരുമാനമാണ് വിവദമായത്.
ചട്ടങ്ങള് ലംഘിച്ചുകൊണ്ട് തിടുക്കപ്പെട്ടാണ് ശനിയാഴ്ച പെരുമഴയത്ത് റോഡ് കോണ്ക്രീറ്റ് ചെയ്യാന് തുടങ്ങിയത്. കാല്നട യാത്രക്കാര്ക്കു വേണ്ടി മാത്രം നിര്മ്മിച്ച നടപ്പാതയാണ് വീതികൂട്ടി വാഹനങ്ങള് കടന്നു പോകുന്ന വിധത്തില് നവീകരിക്കാന് തുടങ്ങിയത്. കേവലം 250 മീറ്റര് മാത്രം നീളമുള്ള ഈ റോഡ് നിര്മ്മിച്ചാല് അതിന്റെ ഗുണം തത്വത്തില് പാര്ട്ടി ഓഫീസിലേക്ക് വരുന്നവര്ക്ക് മാത്രമേ ഉപകരിക്കുകയുള്ളൂ.
റോഡ് വികസിപ്പിക്കുന്നതുമായി ബന്ധപ്പെട്ട് നേരത്തേ കെകെഡിസി ഓഫീസില് നഗരസഭ യോഗം വിളിച്ചു ചേര്ത്തിരുന്നു. നാട്ടുകാരുടെയും കൗണ്സിലര്മാരുടെയും അഭിപ്രായങ്ങള് തേടിയതിന് ശേഷം മാത്രമേ റോഡ് നിര്മ്മിക്കുകയുള്ളൂവെന്ന് ഉറപ്പ് നല്കിയിരുന്നുവെങ്കിലും കൗണ്സിലര്മാര് പോലും അറിയാതെയാണ് റോഡ് നിര്മ്മാണമാരംഭിച്ച്. മഴക്കാലത്ത് തിടുക്കപ്പെട്ട് നിര്മ്മിക്കുന്ന റോഡ് അധികകാലം നിലനില്ക്കില്ലെന്നാണ് നാട്ടുകാര് പറയുന്നത്. സിപിഎം സമ്മര്ദ്ദത്തെ തുടര്ന്നാണ് നഗരസഭാ പൊതുമരാമത്ത് 12,80000 രൂപ ചിലവില് ഈ നടപ്പാതയെ കോണ്ക്രീറ്റ് പാകി വീതികൂട്ടാനുള്ള പ്രവര്ത്തി ആരംഭിച്ചത്.
