കോഴഞ്ചേരി: ജന്മ ശതാബ്ദിയില് സ്വന്തം പേരില് റേഷന് കാര്ഡുമായി ഡോ. ഫിലിപ്പോസ് മാര് ക്രിസോസ്റ്റം വലിയ മെത്രാപ്പോലീത്ത. വയസ്സ് 100 തികഞ്ഞെങ്കിലും സ്വന്തമായി റേഷന് കാര്ഡ് ലഭിക്കുന്നത് ആദ്യം. നേരത്തേ രണ്ട് തവണ അപേക്ഷ നല്കിയെങ്കിലും കുടുംബ വിശദാംശങ്ങള് ഇല്ലാത്തതിനാല് ഇത് നിരസിക്കപ്പെട്ടു.
ഇത്തവണ ഭക്ഷ്യവിഭവ വകുപ്പിന്റെ ആദരവായാണ് വലിയ മെത്രാപ്പോലീത്തയ്ക്ക് എപിഎല് റേഷന് കാര്ഡ് നല്കിയത്.
തിരുവല്ല താലൂക്കിലെ എആര്ഡി ചെട്ടിമുക്ക്് രണ്ടാം നമ്പര് തോമസ് ഏബ്രഹാമിന്റെ റേഷന്കടയില് 1313068155 നമ്പരായാണ് കാര്ഡ് നല്കിയിരിക്കുന്നത്. റേഷന് കാര്ഡിന്റെ പ്രയോജനങ്ങളും ഇനിയും കുടുംബം വിപുലീകരിച്ചാല് അവരെയും ഉള്പ്പെടുത്താന് കഴിയുമോ എന്ന കുസൃതി ചോദ്യം അദ്ദേഹം ഉന്നയിച്ചത് ഉദ്യോഗസ്ഥരില് ചിരിപടര്ത്തി.
ജില്ലാ സപ്ലൈ ആഫീസര് പ്രസന്ന കുമാരി കാര്ഡ് കൈമാറി. താലൂക്ക് സ്പ്ലൈ ഓഫീസര് പി.എസ്. സേവിയര് ഷാജി, റേഷന് സംഘടന ഭാരവാഹികളായ ജോണ്സണ് വിളവിനാല്, കെ. രാജഗോപാല്, ജയചന്ദ്രന്, പി.പി. അച്ചന്കുഞ്ഞ്, മോട്ടി ചെറിയാന് തുടങ്ങിയവര് പങ്കെടുത്തു.
