പുനലൂര്: പട്ടണത്തിലെ ഗതാഗതപ്രശ്നങ്ങള്ക്ക് പരിഹാരമാകുന്നു. ഗതാഗതസംവിധാനങ്ങള് ക്രമീകരിക്കാന് പുനലൂരില് ചേര്ന്ന ട്രാഫിക് അഡൈ്വസറി കമ്മിറ്റിയുടെ യോഗത്തില് തീരുമാനമായി. മുനിസിപ്പല് ചെയര്മാന് എം.എ.രാജഗോപാലിന്റെ നേതൃത്വത്തില് പുനലൂര് സിഐ, എസ്ഐ, മോട്ടോര്വാഹനവകുപ്പ് ഉദ്യോഗസ്ഥര്, ദേശീയപാത-പിഡബ്ല്യുഡി ഉദ്യോഗസ്ഥര്, വ്യാപാരിപ്രതിനിധികള്, മുനിസിപ്പല് അധികൃതര്, വിവിധ രാഷ്ട്രീയപാര്ട്ടി പ്രതിനിധികള് എന്നിവര് പങ്കെടുത്തു.
15 മുതല് പട്ടണത്തില് ഗതാഗതപരിഷ്കാരങ്ങള് നടപ്പാക്കും. പട്ടണത്തിലെ ഗതാഗതതടസം പരിഹരിക്കാന് പാര്ക്കിങ് സംവിധാനം ഉള്പ്പെടെ വിപുലമായ പദ്ധതി ആവിഷ്കരിക്കുമെന്ന് മുനിസിപ്പല് ചെയര്മാന് അറിയിച്ചു. പട്ടണത്തില് ഓട്ടോറിക്ഷകളുടെ എണ്ണം ക്രമാതീതമായി വര്ധിച്ചിട്ടുണ്ട്. 30നകം നിലവില് പുനലൂര് പട്ടത്തിലെ എല്ലാ ഓട്ടോകള്ക്കും പെര്മിറ്റ് ലഭ്യമാക്കി മുനിസിപാലിറ്റി നമ്പര് ഉറപ്പാക്കും. 30ന് ശേഷം പുനലൂരിലെ പെര്മിറ്റ് ഉള്ളവര്ക്ക് മാത്രമെ സര്വീസ് നടത്താനാകൂ. തിരക്കേറിയ ജങ്ഷനുകളില് ഗതാഗതതടസം സൃഷ്ടിക്കുന്നവിധം കറങ്ങിഓടുന്ന ഓട്ടോകള്ക്കെതിരെ കര്ശന നടപടിയുണ്ടാകും.
മേഖലയില് നടപ്പാക്കുന്ന ഗതാഗതക്രമീകരണങ്ങളെക്കുറിച്ച് ചര്ച്ച ചെയ്യാന് നഗരസഭാ അധികൃതര്, ഓട്ടോ തൊഴിലാളികള്, പോലീസ് എന്നിവരുടെ പ്രത്യേകയോഗം 10ന് രാവിലെ 11ന് സ്വയംവരഹാളില് നടക്കും. പട്ടണത്തില് നെല്ലിപ്പള്ളി പോളിടെക്നിക്, ടിബി ജങ്ഷന്, കെഎസ്ആര്ടിസി, ചെമ്മന്തൂര് എന്നിവിടങ്ങളില് പുതിയ വെയിറ്റിങ് ഷെഡുകള് നിര്മിക്കും. പോസ്റ്റോഫീസ് ജങ്ഷനില് യാത്രക്കാര്ക്ക് ബസ് കാത്തിരിക്കാന് സ്ഥലം കണ്ടെത്തും. പോസ്റ്റ് ഓഫീസ് ജങ്ഷനിലെ സമാന്തരസര്വീസുകള് നിയന്ത്രിക്കും. പുനലൂര് കെഎസ്ആര്ടിസി ബസ്സ്റ്റാന്റിന് മുന്നില് സ്വകാര്യബസുകള് നിര്ത്തി ആളുകളെ കയറ്റുന്നത് കര്ശനമായി നിയന്ത്രിക്കും.
