പാലാ: നിര്‍ദ്ദിഷ്ട അങ്കമാലി- അഴുത ശബരി പാതയുടെ അലയ്‌മെന്റ് കുറിഞ്ഞിക്കാവിനെ പൂര്‍ണ്ണമായും നിലനിര്‍ത്തിക്കൊണ്ടാവണമെന്ന് ക്ഷേത്രം ഭാരവാഹി രമേശ് ആവശ്യപ്പെട്ടു. ഈ വിവരം കാണിച്ച് പ്രധാനമന്ത്രിക്കും റയില്‍വേ അധികൃതര്‍ക്കും സംസ്ഥാന സര്‍ക്കാരിനും നിവേദനം നല്‍കിയിട്ടുണ്ടെന്ന് അദ്ദേഹം പത്രസമ്മേളനത്തില്‍ പറഞ്ഞു. നൂറ്റാണ്ടുകള്‍ പഴക്കമുള്ളതും ജൈവവൈവിധ്യവും അപൂര്‍വ്വ ഔഷധ സസ്യങ്ങള്‍ നിറഞ്ഞതുമാണ് മൂന്ന് ഏക്കറോളം വിസ്തൃതിയുള്ള കുറിഞ്ഞിക്കാവ്.
അങ്കമാലി- പുനലൂര്‍ പാതയില്‍ കുറിഞ്ഞി ശ്രീകൃഷ്ണസ്വാമി ക്ഷേത്രത്തിന് സമീപമാണ് ഭഗവതിക്ഷേത്രം ഉള്‍ക്കൊള്ളുന്ന കുറിഞ്ഞിക്കാവ്. കാവുസംരക്ഷണപദ്ധതിയില്‍പ്പെടുത്തി സംസ്ഥാനസര്‍ക്കാര്‍ പരിപാലിക്കുന്നതാണ് ഇവിടം. സംസ്ഥാന ഔഷധ സസ്യബോര്‍ഡും കാവിന്റെ സംരക്ഷണം ഏറ്റെടുത്ത് വിവിധ പദ്ധതികള്‍ നടപ്പിലാക്കി വരികയാണ്.
കാവുള്‍പ്പെടുന്ന സ്ഥലത്ത് 60 അടി വീതിയിലാണ് സര്‍വ്വേ നടത്തി കല്ലിട്ടത്. നെല്ലാപ്പാറയില്‍ മല തുരന്നു നിര്‍മ്മിക്കുന്ന തുരങ്കത്തില്‍ നിന്ന് നീക്കം ചെയ്യുന്ന കല്ലും മണ്ണും ഇടുന്നതിനാണ് ഈ സ്ഥലം ഏറ്റെടുത്തിരിക്കുന്നത്. ഈ ആവശ്യത്തിന് ക്ഷേത്രം വക സ്ഥലം പകരം നല്‍കാര്‍ തയ്യാറാണെന്ന് അധികൃതരെ അറിച്ചിട്ടുണ്ടെന്ന് ക്ഷേത്രം സമിതി പറയുന്നു
