എന്റെ പ്രഭാവം എനിക്ക് മാത്രമുള്ളതാണ്. അതുകൊണ്ടാണ് കേവലം ‘വീക്ഷണം’ നോട്ടംകൊണ്ട് അനേകകോടി ബ്രഹ്മാണ്ഡങ്ങളും ബ്രഹ്മാവ്, രുദ്രന്, ഇന്ദ്രന് മുതലായ ദേവഗണങ്ങളും മനുഷ്യമൃഗപക്ഷി വൃക്ഷലതാദികളും പ്രകൃതിയില് ആവിഷ്കരിക്കപ്പെടുന്നത്.
ഈശ്വരന്മാരെയും ജീവജാലങ്ങളെയും നിയന്ത്രിക്കുന്നതും ഞാനാണ്. അതുകൊണ്ട് എല്ലാ ഈശ്വരന്മാര്ക്കും ഈശ്വരനാണ്- ഭൂതമഹേശ്വരനാണ്. എന്റെ അവതാരലീലകളിലൂടെ എന്റെ പ്രഭാവം ഞാന് പ്രകടിപ്പിക്കുകയും ചെയ്യുന്നു. എന്നിട്ടും എന്റെ തത്വം-യഥാര്ത്ഥാവസ്ഥ-മനസ്സിലാക്കാന് ശ്രമിക്കുകപോലും ചെയ്യാത്തവരുണ്ട്. അവര് എന്നെ പരിഗണിക്കുന്നില്ല. എന്നുമാത്രമല്ല എന്നെ അപമാനിക്കുന്നു; തിരസ്കരിക്കുന്നു; നിന്ദിക്കുന്നു. എന്താണ് കാരണം?
പറയാം, ഒരു കാരണം മനുഷ്യരുടെ ഭൗതിക മാലിന്യം നിറഞ്ഞ ബുദ്ധിക്കും വാക്കിനും എന്റെ തത്വം ഉള്ക്കൊള്ളാന് കഴിയില്ല. രണ്ടാമത്തെ കാരണം ഇതാണ്.
മാനുഷീംതനും ആശ്രിതം
ഒറ്റനോട്ടത്തില് എന്റെ ശരീരം മനുഷ്യരുടെ ശരീരംപോലെ തോന്നും. എന്റെ പ്രവൃത്തികളും മനുഷ്യരുടെ പ്രവൃത്തികളെപ്പോലെ തന്നെ എന്ന തെറ്റിദ്ധാരണയുണ്ടാക്കും. എന്റെ ഉത്തമഭക്തന്മാര് എന്നെക്കണ്ട്, എന്റെ ലീലകള് ആസ്വദിച്ചുകൊള്ളട്ടെ എന്ന കാരുണ്യംകൊണ്ടാണ്, ഞാന് മനുഷ്യരൂപത്തില് തന്നെ ഭൂമിയില് അവതരിച്ചിട്ടുള്ളത് ശ്രീനാരദന് മുതലായ ഭക്തോത്തമന്മാര് എന്റെ വിവിധതരത്തിലുള്ള രൂപങ്ങളെ വര്ണിക്കുന്ന ധ്യാനശ്ലോകങ്ങള് നിര്മിച്ച് മറ്റു ഭക്തന്മാര്ക്ക് നല്കിയിട്ടുണ്ട്.
എന്റെ മന്ത്രങ്ങളും ഉപദേശിച്ചു കൊടുത്തിട്ടുണ്ട്. വൈകുണ്ഠ ലോകത്തില് ഞാന് നാലുകൈകളില് ശംഖചക്രഗദാപദ്മങ്ങള് ധരിച്ചുകൊണ്ടു വിലസുന്നു. അസുരന്മാരോടുള്ള യുദ്ധരംഗങ്ങളില് ഞാന് എട്ടുകൈകളില് ശംഖ്, ചക്രം, വില്ല്, ശരം, കയര്, വാള്, പരിച, ഗദ എന്നീ ആയുധങ്ങള് ധരിച്ച്, ഗരുഡന്റെ പുറത്ത് ഇരുന്നുകൊണ്ട് യുദ്ധം ചെയ്യുന്നു. എന്റെ യഥാര്ത്ഥരൂപം
”ദ്വിഭുജം മുരളീ ഹസ്തം
സച്ചിദാനന്ദ വിഗ്രഹം”
എന്നതാണ്. എന്റെ ദേഹം സത്യവും ജ്ഞാനവും ആനന്ദവും നിറഞ്ഞതാണ്.
രക്തമാംസാസ്ഥികള് നിറഞ്ഞതല്ല. ഞാന് വേണുവൂതിക്കൊണ്ട് ഗോലോകത്തില് സ്ഥിതി ചെയ്യുന്നു. ഈ യഥാര്ത്ഥ തത്ത്വം പണ്ഡിതന്മാരെന്നും, ബ്രഹ്മജ്ഞാനികളെന്നും വേദാന്തികളെന്നും പറയപ്പെടുന്നവര്ക്ക് അറിയുകയേ ഇല്ല. അവര് ഈ വസ്തുതയില് മൂഢന്മാരാണ്. അതുകൊണ്ടാണ് അവര് എന്നെ നിന്ദിക്കുകയും തിരസ്കരിക്കുകയും ചെയ്യുന്നത്. അതുകൊണ്ട് അവര് എന്നെ ഭജിക്കുന്നില്ല; ഭജിക്കാത്തതുകൊണ്ട് എന്റെ തത്വ വിജ്ഞാനങ്ങള്ക്ക് ലഭിക്കുന്നുമില്ല.
”ഭക്ത്യാലഭ്യസ്ത്വപനന്യയാ” എന്ന് ഞാന് മുന്പേ പറഞ്ഞല്ലോ.
