എരുമേലി: പരിസ്ഥിതി ദിനാചരണം ലക്ഷ്യമിട്ട് കനകപ്പലം സോഷ്യല്‍ ഫോറസ്ട്രിയുടെ വളപ്പില്‍ 2,35,000 വൃക്ഷത്തൈകളാണ് വിതരണത്തിന് തയ്യാറാക്കിയിരിക്കുന്നത്. അര്‍ബുദത്തെ തടയുന്ന ലക്ഷ്മിതരുവും ആത്തിയും ആര്യവേപ്പും ചന്ദനവും പ്ലാവും, നീര്‍മാതളവുമൊക്കെയുണ്ട് വൃക്ഷത്തൈ ശേഖരത്തില്‍.
25മുതലാണ് തൈവിതരണം ചെയ്യുന്നത്. ജില്ലയിലെ സാമൂഹ്യ വനവല്‍ക്കരണവിഭാഗത്തിന്റെ പ്രധാന റേഞ്ചോഫീസായ കനകപ്പലത്തുനിന്നും പനക്കച്ചിറയിലെ ഓഫീസില്‍ നിന്നുമാണ് ഓരോ പരിസ്ഥിതി ദിനത്തിലും ജില്ലയ്‌ക്ക് അകത്തും പുറത്തും വൃക്ഷതൈകള്‍ വിതരണം ചെയ്യുന്നത്. കനകപ്പലത്ത് ഒന്നര ലക്ഷത്തോളവും പനക്കച്ചിറയില്‍ ഒരു ലക്ഷത്തോളവുമാണ് തൈകള്‍ ഇപ്പോഴുള്ളത്. സംഘടനകള്‍, സ്‌കൂളുകള്‍, തദ്ദേശ സ്വയം ഭരണ സ്ഥാപനങ്ങള്‍, വ്യക്തികള്‍ തുടങ്ങിയവരിലേക്കാണ് ഇവിടെ നിന്നു തൈകള്‍ വിതരണം ചെയ്യുക. സൗജന്യ നിരക്കിലാണ് വില ഈടാക്കുന്നത് കൂടാതെ സൗജന്യവിതരണവുമുണ്ട്.
വൃക്ഷതൈ പരിപാലനത്തില്‍ അതീവ തത്പരരായ ഉദ്യോഗസ്ഥരെയാണ് വനംവകുപ്പ് ഇവിടേക്ക് നിയമിക്കാറുളളത്. ഇവരുടെ മേല്‍നോട്ടവും ശ്രദ്ധയും ഓരോ തൈകളിലും മാസങ്ങളോളമുണ്ടാകും.കരിമ്പിന്‍തോട് വനത്തില്‍ നിന്നാണ് തൈകള്‍ക്കുള്ള ശേഖരണം.
ശബരിമല വനത്തില്‍ നിന്നും ഹൈറേഞ്ചിന്റെ മലമടക്കുകളില്‍ നിന്നും ആദിവാസികളുടെ സഹായത്തോടെയാണ് തൈകള്‍ ശേഖരിക്കുന്നത്.
