ചങ്ങനാശ്ശേരി: ക്യഷ്ണപ്രിയ എന്ന പ്ലസ്വണ് വിദ്യാര്ത്ഥി തന്റെ വെപ്പുകാലില് ആയാസപ്പെട്ടു സന്തോഷവതിയായി കടന്നുവരുമ്പോള് എല്ലാ കണ്ണുകളും ക്യഷ്ണപ്രിയയിലായി. ക്യാന്സര് രോഗം മൂലം ഒരു കാല് മുറിച്ചു മാറ്റിയ ക്യഷ്ണപ്രിയ ചീരഞ്ചിറയിലുളള ചാരിറ്റി വേള്ഡ് അങ്കണത്തില് ഈസ്റ്റര് സമ്മാനം സ്വീകരിക്കാനെത്തിയതായിരുന്നു.
പരിപാടിയുടെ ഉദ്ഘാടനത്തിനെത്തിയ മാര് തോമസ് തറയില് അവളുടെ അരികിലെത്തി ചോദിച്ചു. സന്തോഷവതിയാണല്ലോ. അസുഖത്തിന്റെ അസ്വസ്ഥതകള് ഒന്നുമില്ലേ?
ക്യഷ്ണപ്രിയ പറഞ്ഞു. രോഗം വന്നു, അതില് ദു:ഖിച്ചിട്ടെന്താ കാര്യം.തുടര്ന്ന് ഉദ്ഘാടനം നിര്വ്വഹിച്ച് മാര് തോമസ് തറയില് പറഞ്ഞു ക്യഷ്ണപ്രിയ എന്നെ അദ്ഭുതപ്പെടുത്തി. ഇങ്ങനെയുളളവര് രോഗികളായ മനുഷ്യര്ക്ക് വലിയ പ്രത്യാശയുടെ സന്ദേശമാണ് നല്കുന്നത്. 100 ഓളം ക്യാന്സര്, കിടപ്പു രോഗികള് എന്നിവര്ക്കായിരുന്നു ഈസ്റ്റര് സമ്മാനം വിതരണം ചെയ്തത്. ഫാ.സെബാസ്റ്റ്യന് പുന്നശ്ശേരി അദ്ധ്യക്ഷത വഹിച്ചു.
