കള്ളനോട്ട്; മുഖ്യപ്രതിയെ തിരിച്ചറിഞ്ഞു

ഇടുക്കി: വണ്ടിപ്പെരിയാറില്‍ 500 രൂപയുടെ കള്ളനോട്ട് പിടിച്ച കേസില്‍ മുഖ്യപ്രതിയെ തിരിച്ചറിഞ്ഞതായി സൂചന. കഴിഞ്ഞ ഒമ്പതിനാണ് 4,38,500 രൂപയുടെ കള്ളനോട്ടുമായി നെടുങ്കണ്ടം സ്വദേശി ജോജോ ജോസഫ്(30), ഭാര്യ അനുപമ(26) എന്നിവര്‍ പിടിയിലായത്. റിമാന്‍ഡില്‍ കഴിയുന്ന ഇരുവര്‍ക്കുമെതിരെ 10-ാം തിയതി തന്നെ പോലീസ് യുഎപിഎ ചുമത്തിയിരുന്നു. ഈ കേസില്‍ ഇവര്‍ക്ക് പണം നല്‍കിയെന്ന് പറയുന്ന തമിഴ്‌നാട് മധുര സ്വദേശിയെ തിരിച്ചറിഞ്ഞതായാണ് വിവരം. ഇയാളുടെ അടുത്ത് വരെ അന്വേഷണ സംഘം എത്തിയതായും ഉന്നത പോലീസ് വൃത്തങ്ങള്‍ സൂചന നല്‍കുന്നു.

അതേസമയം കേസ് എന്‍ഐഎ ഏറ്റെടുത്തു എന്ന തരത്തിലുള്ള പ്രചാരണം ശരിയല്ലെന്നും ഉന്നത പോലീസ് ഉദ്യോഗസ്ഥര്‍ വ്യക്തമാക്കി. എന്‍ഐഎ അന്വേഷണം നടത്തുന്നുണ്ടെങ്കിലും കേസ് ജില്ലാ പോലീസ് മേധാവിയുടെ മേല്‍നോട്ടത്തില്‍ കട്ടപ്പന ഡിവൈഎസ്പി ആണ് അന്വേഷിക്കുന്നത്. 3 സിഐ മാരും രണ്ട് എസ്‌ഐമാരുമടക്കം 20 ഓളം വരുന്ന പോലീസ് സംഘം വിവിധ സംഘങ്ങളായി തിരിഞ്ഞാണ് അന്വേഷണം നടത്തുന്നത്. രാജ്യാന്തര തലത്തില്‍ വ്യാപിച്ച് കിടക്കുന്ന വലിയൊരു ചെയിനിന്റെ താഴെ തട്ടിലെ ഒരാളെയാണ് പിടികൂടാനായതെന്നും അന്വേഷണം രണ്ട്, മൂന്ന് ചെയിനുകള്‍ കടന്ന് മുന്നോട്ട് പോയതായും വിവരമുണ്ട്. പ്രധാനമായും നോട്ട് വിതരണം ചെയ്യുന്ന ശൃഖലയിലാണ് അന്വേഷണം നിലവില്‍ നടക്കുന്നത്.

നോട്ട് അച്ചടിച്ചതെവിടെ എന്നതടക്കം അന്വേഷിച്ച് വരികയാണ്. പെട്ടെന്ന് തിരിച്ചറിയാനാകാത്ത വിധം നിര്‍മ്മിച്ചിരിക്കുന്ന നോട്ടുകളായതിനാല്‍ കേരളത്തിന്റെ മറ്റ് മേഖലകളിലും നോട്ടുകള്‍ എത്താനുള്ള സാധ്യത തള്ളിക്കളയാനാവില്ലെന്നും പോലീസ് ഉദ്യോഗസ്ഥര്‍ പറഞ്ഞു. 4 ലക്ഷം രൂപയുടെ ഒറിജിനല്‍ നോട്ട് നല്‍കിയാണ് ഇരട്ടി തുകയായി 8 ലക്ഷത്തിന്റെ കള്ളനോട്ട് ജോജോ വാങ്ങിയത്. ഇതില്‍ 1 ലക്ഷം വീതം എറണാകുളത്തെ മൂന്ന് സുഹൃത്തുക്കള്‍ക്ക് നല്‍കിയതായും പിടികൂടിയതിന്റെ ബാക്കി തുക ചില്ലറയായി ചിലവാക്കിയതായും ആണ് ജോജോ പറയുന്നത്.

ജോജോയ്‌ക്ക് തമിഴ്‌നാട്ടില്‍ കന്നുകാലി ഫാമുണ്ടായിരുന്നെന്നും ഇത് പൊളിഞ്ഞതോടെയുണ്ടായ സാമ്പത്തിക ബാധ്യത മറികടക്കാനാണ് ഇത്തരത്തിലൊരു പദ്ധതിയുമായി കേരളത്തിലേക്ക് എത്തിയതെന്നുമാണ് വിവരം. കൈക്കുഞ്ഞിനൊപ്പമാണ് അനുപമ കോട്ടയം വനിതാ സബ് ജയിലില്‍ റിമാന്‍ഡില്‍ കഴിയുന്നത്.

കേസിന്റെ തുടര്‍ന്നുള്ള അന്വേഷണത്തിന്റെ ഭാഗമായി ജോജോയെ തിങ്കളാഴ്ച കസ്റ്റഡിയില്‍ വാങ്ങാനുള്ള നീക്കത്തിലാണ് പോലീസ്. മുട്ടത്തെ ജില്ലാ കോടതിയാണ് കേസ് പരിഗണിക്കുന്നത്. നോട്ട് പിന്‍വലിച്ച് 6 മാസം തികയുന്നതിന് മുമ്പ് തന്നെ രാജ്യത്ത് സമാന്തര ശക്തിയായി കള്ളനോട്ട് മാഫിയ വളരുന്നതിന്റെ വ്യക്തമായ സൂചനയാണ് ഈ കേസിലൂടെ പുറത്ത് വരുന്നത്. ഇത്തരത്തില്‍ കോടികളുടെ 500,1000 രൂപ നോട്ടുകള്‍ രാജ്യത്താകെ വിതരണം ചെയ്തതായും അനൗദ്യോഗിക വിവരമുണ്ട്.