തിരുവനന്തപുരം: സംസ്ഥാന നിയമസഭ പാസ്സാക്കിയ മാരിടൈം ബില് പിന്വലിക്കാനുള്ള പ്രമേയം ഈ സഭാസമ്മേളനത്തില് തന്നെ അവതരിപ്പിക്കുമെന്ന് നിയമമന്ത്രി എ.കെ. ബാനലന്റെ ഓഫീസ് അറിയിച്ചു. ബില് പുനഃപരിശോധിക്കണമെന്നാവശ്യപ്പെട്ട് രാഷ്ട്രപതി മടക്കി. ഇതിന്മേല് ഭരണഘടനയുടെ 201-ാം അനുച്ഛേദം അനുസരിച്ച് ബില് റദ്ദാക്കണമെന്ന് ഗവര്ണര് ജസ്റ്റിസ് പി. സദാശിവം വ്യക്തമാക്കിയിരുന്നു.
പുതിയ ബില് അടുത്ത നിയമസഭാ സമ്മേളനത്തിലേ ഉണ്ടാകൂ. കേന്ദ്രനിയമത്തിനനുസൃതമായി ഭേദഗതികളോടെയായിരിക്കും പുതിയ ബില് വരിക. തുടര്ന്ന് സബ്ജക്ട് കമ്മറ്റിയിലും മറ്റും ചര്ച്ച ചെയ്തശേഷം ബില് പാസ്സാക്കി രാഷ്ട്രപതിയുടെ അംഗീകാരത്തിനായി അയയ്ക്കും. തുറമുഖവികസനം, പരിപാലനം എന്നിവ കേന്ദ്രപരിധിയിലുള്ള വിഷയങ്ങളാണ്. അതിനാല് കേന്ദ്ര നിയമത്തിനനുസൃതമായി മാത്രമേ സംസ്ഥാനവും നിയമനിര്മാണം നടത്താവൂ. നിലവിലെ ബില് 2014 ല് നിയമസഭ പാസ്സാക്കിയതാണ്. അതില് കേന്ദ്രനിയമത്തിന് യോജിക്കാത്തതുണ്ടെന്ന കണ്ടെത്തലിലാണ് ബില് രാഷ്ട്രപതി തിരിച്ചയച്ചത്. തുറമുഖവകുപ്പ്, മാരിടൈം സൊസൈറ്റി, മാരിടൈം വികസന കോര്പ്പറേഷന് എന്നിവ ലയിപ്പിച്ച് മാരിടൈം ബോര്ഡ് രൂപീകരിക്കാന് നിര്ദ്ദേശിക്കുന്നതാണ് ബില്.
രാഷ്ട്രപതി പുനഃപരിശോധിക്കാന് നിര്ദ്ദേശിച്ച ബില് റദ്ദാക്കണമെന്ന ഗവര്ണറുടെ ശുപാര്ശയില് അസ്വാഭാവികതയുണ്ടെന്ന് പ്രതിപക്ഷ നേതാവ് രമേശ് ചെന്നിത്തല സഭയില് ചൂണ്ടിക്കാട്ടിയിരുന്നു. ബില് പിന്വലിക്കാനുള്ള അധികാരം സഭയ്ക്കു മാത്രമാണ്. അതിന്മേല് ഗവര്ണര്ക്ക് ഇടപെടാനാകില്ലെന്നാണ് പ്രതിപക്ഷവാദം. ഗവര്ണറുടെ തീരുമാനത്തിന്മേല് സഭയില് ചര്ച്ച അനുവദിക്കാനാകില്ലെന്ന് സ്പീക്കര് പി. ശ്രീരാമകൃഷ്ണന് വ്യക്തമാക്കിയതോടെ തര്ക്കം അവസാനിച്ചു.
