കോട്ടയം: പൊതുവിദ്യാഭ്യാസ മേഖലയോടുള്ള സര്ക്കാരിന്റെ സമീപനം നിരുത്തരവാദപരമാണെന്ന് എന്എസ്എസ്. സര്ക്കാരിന്റെ കണക്കനുസരിച്ച് പൊതുവിദ്യാഭ്യാസമേഖലയില് സംസ്ഥാനത്തുള്ള 12615 സ്കൂളുകളില് 7145 എണ്ണം എയിഡഡ് മേഖലയില് പ്രവര്ത്തിക്കുന്നവയാണ്. ഇവയുടെ പ്രവര്ത്തനം കഴിഞ്ഞ 5 വര്ഷങ്ങളായി ഏറെ പ്രതിസന്ധിയിലാണ്. വിദ്യാഭ്യാസ അവകാശനിയമം 2009-ല് നിലവില് വന്നതിനുശേഷം അതു നടപ്പിലാക്കാന് സംസ്ഥാനസര്ക്കാര് സ്വീകരിച്ച തത്ത്വദീക്ഷയില്ലാത്ത ചില തീരുമാനങ്ങളാണ് ഈ ദുരവസ്ഥയ്ക്ക് കാരണമെന്ന് എന്എസ്എസ് ജനറല് സെക്രട്ടറി ജി. സുകുമാരന് നായര് പ്രസ്താവനയില് ചൂണ്ടിക്കാട്ടി.
ഒന്നു മുതല് അഞ്ചുവരെ ക്ലാസ്സുകളില് 1:30 എന്നും, ആറു മുതല് എട്ടുവരെ ക്ലാസ്സുകളില് 1:35 എന്നും അദ്ധ്യാപക-വിദ്യാര്ത്ഥി അനുപാതം ക്രമപ്പെടുത്തുക എന്ന വിദ്യാഭ്യാസ അവകാശനിയമത്തിലെ നിര്ദ്ദേശത്തില് നിന്ന് സംസ്ഥാനസര്ക്കാര് പിന്നാക്കം പോവുകയും നാലുവര്ഷത്തിനുശേഷം മാത്രം ആ നിര്ദ്ദേശം നടപ്പാക്കാന് തയ്യാറാവുകയുമാണ് ഉണ്ടായത്.
സാമ്പത്തിക പ്രശ്നത്തിന്റെ പേരില് 2011 മുതല് സ്കൂളുകളില് സ്റ്റാഫ് ഫിക്സേഷന് നല്കാതെ 2015-16 വര്ഷം സ്റ്റാഫ് ഫിക്സേഷന് ഉത്തരവ് നല്കി. അതിന്റെ ഫലമായി പുതിയ ഒഴിവുകളില് അദ്ധ്യാപകനിയമനം നടന്നില്ല. നടന്നാല്തന്നെ അംഗീകാരം ലഭിക്കാത്ത സാഹചര്യമാണ് നിലവിലുള്ളത്. ഇത് കുട്ടികളുടെ പഠനത്തെയും സ്കൂളുകളുടെ നിലനില്പിനെയും ദോഷകരമായി ബാധിച്ചതായും അദ്ദേഹം ചൂണ്ടിക്കാട്ടി.
സ്ഥിരം ഒഴിവുകളില് ദിവസവേതന അടിസ്ഥാനത്തില്പോലും ആളുകളെ വയ്ക്കാന് നിയമമില്ല. കുട്ടികള് കുറവായ സ്കൂളുകള് അണ്എക്കണോമിക് എന്ന വിഭാഗത്തില്പ്പെടുത്തി, അവിടെയും നിയമനനിരോധനം ഏര്പ്പെടുത്തിയിരിക്കുകയാണ്. ‘പുതിയ സ്കൂളുകള്’ എന്ന വിഭാഗത്തില്പെടുന്ന സ്കൂളുകളിലെ തസ്തികകളില് പൂര്ണ്ണമായും പ്രൊട്ടക്ടഡ് അദ്ധ്യാപക-അനദ്ധ്യാപകരെ നിയമിക്കണമെന്നാണ് സര്ക്കാര് വ്യവസ്ഥ ചെയ്തിരിക്കുന്നത്. ഏതുതരം നിയമനമാണെങ്കിലും അത് പ്രൊട്ടക്ടഡ് അദ്ധ്യാപകരുമായി ബന്ധിപ്പിച്ച് സങ്കീര്ണ്ണമാക്കി നിയമനം അംഗീകരിക്കപ്പെടാതിരിക്കുന്ന സാഹചര്യമാണ് സൃഷ്ടിച്ചിരിക്കുന്നത്.
സര്ക്കാര് കണക്കനുസരിച്ച് പ്രൊട്ടക്ടഡ് അദ്ധ്യാപകരുടെ എണ്ണം 3597 ആണ്. സംസ്ഥാനത്ത് 12615 സര്ക്കാര്-എയിഡഡ് സ്കൂളുകള് പ്രവര്ത്തിക്കുന്നുണ്ട്. ഏതാണ്ട് നാല് സ്കൂളുകള്ക്ക് ഒരു പ്രൊട്ടക്ടഡ് ജീവനക്കാരന് എന്ന കണക്കില് വിന്യസിച്ചാല് വളരെ പെട്ടെന്ന് പരിഹരിക്കാവുന്ന പ്രശ്നമാണ് ഇത്. എന്നാല് ഇത്തരത്തില് ഒറ്റത്തവണ തീര്പ്പ് എന്ന സമീപനത്തില്നിന്ന് സര്ക്കാര് മനഃപൂര്വം ഒഴിഞ്ഞുനില്ക്കുകയാണ്. സര്ക്കാരിന് ഇച്ഛാശക്തി ഉണ്ടെങ്കില് വളരെ ലളിതമായ ഈ പ്രശ്നം അടുത്ത അദ്ധ്യയനവര്ഷത്തിന്റെ തുടക്കത്തില്ത്തന്നെ എന്നെന്നേക്കുമായി പരിഹരിക്കാവുന്നതാണെന്നും എന്എസ്എസ് ജനറല് സെക്രട്ടറി അഭിപ്രായപ്പെട്ടു.
ഈ പ്രശ്നങ്ങള്ക്കെല്ലാം പരിഹാരം ഉണ്ടാകേണ്ടത് അത്യന്താപേക്ഷിതമാണ്. സാധാരണക്കാരുടെ വിദ്യാഭ്യാസത്തിനുതകുന്ന എയിഡഡ് വിദ്യാലയങ്ങള് ഇന്നു നേരിടുന്ന പ്രതിസന്ധികള്ക്ക് പരിഹാരം കാണേണ്ടത് സര്ക്കാരിന്റെ കടമയാണ്. ഇക്കാര്യത്തില് യാഥാര്ത്ഥ്യബോധത്തോടുകൂടിയുള്ള സമീപനം സംസ്ഥാനസര്ക്കാര് സ്വീകരിക്കണമെന്നും അദ്ദേഹം ആവശ്യപ്പെട്ടു.
