മകന്‍ വഴക്കാണെങ്കിലും ചന്ദ്രന്റെ അഹങ്കാരത്തിനൊട്ടും കുറവുവന്നില്ല. അതാണ് വിനായകന്റെ ഗജാനനം കണ്ട് പുഛത്തോടെ കളിയാക്കി ചിരിച്ചത്. വിനായകന്‍ അന്നു കുറിച്ചിട്ടതാണ് ചന്ദ്രന്റെ കാര്യം. എന്നാല്‍ തന്റെ അഛന്‍ ശ്രീപരമേശ്വരന്‍ ഇവനെ തലേല്‍ കയറ്റിവച്ചേക്കുകയാ. അതുകൊണ്ട് എടുത്തു കുടയാനും പറ്റില്ല. ബ്രഹ്മദേവനും ദേവേന്ദ്രനും വരെ ഇവനെക്കൊണ്ട് പൊറുതിമുട്ടിയിരിക്കുന്ന സ്ഥിതിക്ക് ഇവനുള്ള ശിക്ഷ താന്‍ തന്നെ ഉറപ്പാക്കണമെന്ന് ശ്രീഗണപതി നിശ്ചയിച്ചു.
ഏതായാലും അഛന്‍ ഈ അഹങ്കാരത്തിന് കൂട്ടുനില്‍ക്കാന്‍ പാടില്ലാത്തതാണ്. ചിലപ്പോള്‍ ഇവനുള്ള ശിക്ഷ ഞാന്‍ വിധിക്കട്ടെ എന്നു കരുതിയായിരിക്കാം. അഛന്റെ മൗനം. അഛന്‍ മൗനിയായിരിക്കും. അഛന്റെ മുഖഭാവം കണ്ട് മറ്റുള്ളവര്‍ കാര്യം മനസിലാക്കി പ്രവര്‍ത്തിക്കണം. എല്ലാവരും അറിവുള്ളവരാകണം എന്ന ആഗ്രഹംകൊണ്ടായിരിക്കാം അഛന്റെ ഈ മൗനം. അഛന്റെ ബുദ്ധി അപാരം. പല കാര്യങ്ങളിലും അഛന്‍ മൗനിയായി നിന്ന് എന്നെക്കൊണ്ട് തീരുമാനമെടുപ്പിച്ച് പ്രവര്‍ത്തിപ്പിച്ചിട്ടുണ്ട്.
ഒരുനാള്‍ ശ്രീഗണേശന്‍ തന്റെ ഉണ്ണിക്കുടവയറും തഴുകിക്കൊണ്ട് പതുക്കെ നടന്നുവരികയായിരുന്നു. വയറ് വല്ലാണ്ടു നിറഞ്ഞോ എന്നൊരു സംശയം. ഇല്ല, അല്‍പമെന്തെങ്കിലും കൂടി കഴിക്കാമായിരുന്നു. എന്നാല്‍ മുന്‍വശം കാണാന്‍ വയ്യ. ലോകത്തിന്റെ പാപഭാരം മുഴുവന്‍ എന്റെ വയറ്റിലാണല്ലോ. മുന്‍വശം കാണാഞ്ഞാണ് ഞാന്‍ മുകളിലേക്ക് നോക്കിയത്. അവടെ ഒരുത്തന്‍ സുന്ദരന്‍ ചമഞ്ഞ് തന്നെ കളിയാക്കിച്ചിരിക്കുകയാണ്- ചന്ദ്രന്‍. ഇവനെ കാണാന്‍ കൊള്ളാത്തവനാക്കിയിട്ടുതന്നെ ഇനി കാര്യം. അതിനെന്താ വഴി?
വഴി തിരിയാഞ്ഞിട്ടാണോ, ശ്രീഗണേശന്‍ കാലൊന്ന് വഴുതി താഴെ കമഴ്ന്നുവീണു. ഇതു കണ്ട് ചന്ദ്രന്റെ ചിരി അല്‍പം ഉച്ചത്തിലായി.
ഗേണശന്‍ ചോദിച്ചു: എന്താ ചിരിക്കണത്.
ചന്ദ്രന്‍: കണ്ടതുകൊണ്ട് ചിരിച്ചതാ. കാണാന്‍ നല്ല ശേല്.
ചന്ദ്രന്റെ സംഭാഷണം അര്‍ഥംവച്ചു കളിയാക്കലാണെന്ന് ഗണപതിക്കറിയാം.
ഗണേശന്‍ മറുപടി നല്‍കി: ”നിന്റെ ശേലുകണ്ടാല്‍ പിന്നെ അന്നാരും ഒന്നും കഴിക്കില്ല. നിന്നെക്കണ്ടു പഠിച്ചാല്‍ ആര്‍ക്കും വഴിതെറ്റിപ്പോകും. അത്ര വഴിപിഴച്ചതാണല്ലോ നിന്റെ ജീവിതം.
ചന്ദ്രന്‍ ഒന്നു ചൂളിപ്പോയി. ഈ വിദ്വാന്‍ എല്ലാം അറിഞ്ഞിരിക്കുന്നു. ഇവനെ പിണക്കാന്‍ പാടില്ലായിരുന്നു. സംഭാഷണം സ്‌നേഹസംഭാഷണമാക്കണം എന്ന് ചന്ദ്രന്‍ തിരിച്ചറിഞ്ഞു.
”എന്റെ ശേലിനെന്താ കുഴപ്പം? ഞാന്‍ സുന്ദരനല്ലെ?”
ശ്രീഗണേശന്‍: മോന്ത കണ്ടാല്‍ മതി. നീ ആ വെള്ളത്തില്‍ നിന്റെ നിഴലൊന്നു സൂക്ഷിച്ചുനോക്ക്. അപ്പോള്‍ മനസിലാകും മോന്തയുടെ ശേല്.
അപ്പോഴാണ് ചന്ദ്രന്‍ കണ്ണാടി നോക്കും പോലെ വെള്ളത്തിലേക്കു നോക്കിയത്. പാവം കരഞ്ഞുപോയി.
