എം.ഡി. ബാബുരഞ്ജിത്ത്
കരുനാഗപ്പള്ളി: ക്ഷീരകര്ഷകര്ക്ക് കുറഞ്ഞ ചെലവില് ഗുണനിലവാരമുള്ള കാലിത്തീറ്റ ലഭ്യമാക്കുക എന്ന ലക്ഷ്യത്തോടെ രൂപീകരിച്ച കേരളാ ഫീഡ്സ് അഴിമതിയും കെടുകാര്യസ്ഥതയും കാരണം പ്രതിസന്ധിയിലേക്ക്. പ്ലാന്റ്’ഇന്ന് 60 കോടിയോളം രൂപയുടെ നഷ്ടത്തിലാണ് പ്രവര്ത്തിക്കുന്നതെന്നാണ് ആരോപണം.
കമ്പനി തുടങ്ങിയ നാള് മുതല് തന്നെ വിവിധ നിര്മാണപ്രവര്ത്തനങ്ങളുമായി ബന്ധപ്പെട്ട് അഴിമതി ആരോപണങ്ങള് ഉയര്ന്നിരുന്നു. പ്ലാന്റിനുള്ളിലെ കെട്ടിടത്തിലേക്ക് ഓഫീസ് ഷിഫ്റ്റ് ചെയ്തതുമായി ബന്ധപ്പെട്ട് പത്തര ലക്ഷം രൂപയാണ് ചെലവാക്കിയിരിക്കുന്നത്.
പ്ലാന്റിനുളളില് 52 ലക്ഷത്തോളം രൂപ ചെലവിട്ട് നിര്മിച്ച കനാല് പൂര്ത്തികരിച്ച് ദിവസങ്ങള്ക്കുള്ളില് തന്നെ തകര്ന്നതും വിവാദമായി. വസ്തു ഏറ്റെടുക്കുന്നതുമായി ബന്ധപ്പെട്ട് 64 ലക്ഷത്തില്പരം രൂപ കമ്പനിക്ക് നഷ്ടമുണ്ടായെന്നും ആരോപണമുണ്ട്.
കമ്പനിയിലെ പല നിര്മ്മാണ പ്രവര്ത്തനങ്ങളിലും നടപടിക്രമം പാലിക്കുന്നില്ലെന്ന് ആക്ഷേപം ശക്തമാണ്. ടെണ്ടര് നടപടികളില് സുതാര്യത ഇല്ല. സ്ഥാപനത്തില് ജോലി ചെയ്യുന്നവരുടെ പേരില് വര്ക്ക് എടുക്കുന്നതു കൂടാതെ പൊതുമരാമത്തു വിഭാഗം നിശ്ചയിച്ചതില് കുടുതല് തുകയാണ് നല്കുന്നതെന്നും ചൂണ്ടിക്കാണിക്കപ്പെടുന്നു.
കേന്ദ്ര വനിതാ ശിശുക്ഷേമ മന്ത്രാലയത്തില് നിന്നും ആടുവളര്ത്തല് പദ്ധതിക്കായി 2012ല് 1.60 കോടി രൂപ കമ്പനിക്കു ലഭിച്ചെങ്കിലും പദ്ധതി നടപ്പാക്കുകയോ സര്ക്കാരിലേക്ക് തുക തിരികെ നല്കുകയോ ചെയ്തിട്ടില്ല. എംഡിയും ഡെപ്യൂട്ടി മാനേജരും എഞ്ചിനീയറും സര്ക്കാരിന്റെ അനുമതിയില്ലാതെ ഇറ്റലി, ജര്മ്മനി, അമേരിക്ക തടങ്ങിയ രാജ്യങ്ങളിലേക്ക് യാത്ര നടത്തിയ വകയില് കമ്പനിക്ക് ലക്ഷങ്ങളുടെ നഷ്ടം വരുത്തിയിട്ടുണ്ടെന്ന് ധനകാര്യവകുപ്പിന്റെ പരിശോധനയില് ചൂണ്ടിക്കാണിക്കുന്നു.
കാലിത്തീറ്റയില് ഉപയോഗിക്കുന്ന യൂറിയയ്ക്കു പകരം വിദേശകമ്പനിയില് നിന്നും ഒപ്ടിജന് വാങ്ങിയതിലും വന്അഴിമതിയാണ് ആരോപിക്കുന്നത്. സ്റ്റോര് പര്ച്ചേയ്സ് നിയമങ്ങള് പാലിക്കാതെ മെട്രിക് ടണ്ണിന് 8000 രൂപ വിലയുള്ള യൂറിയയ്ക്കു പകരം 80000 രൂപ വിലയുള്ള ഒപ്ടിജന്, ആള്ടെക്ക് എന്ന വിദേശ കമ്പനിയില് നിന്നും വാങ്ങിയതാണ് പ്രശ്നമായത്.
കേരളാ ഫീഡ്സിന്റെ ഫാക്ടറിയോട് ചേര്ന്ന് ബൈപാസ് പ്രോട്ടിന്റെ പ്ലാന്റ് നിര്മ്മിക്കുന്നതിന് ഒന്നര കോടിയോളം രൂപ മുടക്കി വാങ്ങിയ യന്ത്രങ്ങള് മഴയും വെയിലുമേറ്റ് നശിക്കുകയാണ്. അഴിമതികള് ചൂണ്ടിക്കാട്ടി ലോകായുക്തയില് കേസ് നടക്കുന്നു. വിജിലന്സും അന്വേഷണം നടത്തി വരുന്നുണ്ട്.
