പന്തളം: പന്തളത്ത് ഞായറാഴ്ച പെയ്ത ശക്തമായ മഴയോടൊപ്പമുണ്ടായ ഇടിമിന്നലില് കമ്പ്യൂട്ടറുകളും ഇന്റര്നെറ്റും തകരാറിലായത് പന്തളം സബ് ട്രഷറിയുടെ പ്രവര്ത്തനം തടസ്സപ്പെടുത്തി. ഇത് തിങ്കളാഴ്ചയും ചൊവ്വാഴ്ചയും ട്രഷറിയില് പെന്ഷന് വാങ്ങാനെത്തിയവരെ ഏറെ വലച്ചു. 3 കമ്പ്യൂട്ടറുകളും ഇന്റര്നെറ്റിന്റെ മോഡവുമാണ് മിന്നലില് തകര്ന്നത്. ഇതോടെ തിങ്കളാഴ്ച ട്രഷറി പ്രവര്ത്തനം നിലച്ചു.
ഇന്നലെ ഉച്ചയോടെ തകരാറുകള് ഭാഗികമായി ശരിയാക്കിയതോടെയാണ് പ്രവര്ത്തനം ചെറിയ തോതില് പുനഃസ്ഥാപിക്കാനായത്. ശക്തമായ ഇടിമിന്നലില് പന്തളത്തെ നിരവധി വീടുകളില് ഫ്രിഡ്ജ്, ടിവി, ഫാന് എന്നിവയുള്പ്പെയുള്ള വൈദ്യുതോപകരണങ്ങള് നശിച്ച് ലക്ഷക്കണക്കിനു രൂപയുടെ നഷ്ടമാണുണ്ടായത്. ടെലിഫോണ്, ഇന്റര്നെറ്റ്, കേബിള് ടിവി കണക്ഷനുകളും ഏതാണ്ട് പൂര്ണ്ണമായും തകരാറിലാവുകയും ചെയ്തു.
