കണ്ണൂര്: ജില്ലയില് അഞ്ച് വയസ്സിനു താഴെയുള്ള 6191 കുട്ടികള് പ്രതിരോധ കുത്തിവെപ്പ് എടുക്കാത്തവരായിട്ടുണ്ടെന്ന് ജില്ലാ ആര്സിഎച്ച് ഓഫീസര് ഡോ.പി.എം ജ്യോതി. മഴക്കാലപൂര്വ ശുചീകരണവുമായി ബന്ധപ്പെട്ട് കലക്ടറേറ്റില് ചേര്ന്ന യോഗത്തില് സംസാരിക്കുകയായിരുന്നു അവര്. രണ്ട് വയസ്സില് താഴെയുള്ള 2696ഉം അതിനു മുകളില് അഞ്ച് വയസ്സ് വരെ പ്രായമുള്ള 3495ഉം പേര് ഉള്പ്പെടെയാണിത്. ഇവര്ക്ക് കുത്തിവെപ്പ് നല്കുന്നതിനായി ഓരോ ആരോഗ്യ കേന്ദ്രത്തിന്റെ കീഴിലും ജൂലൈ വരെയുള്ള ഓരോ മാസവും 7 മുതല് 14 വരെ തീയതികളില് മിഷന് ഇന്ദ്രധനുഷിന്റെ ഭാഗമായി പ്രത്യേക ക്യാംപുകള് നടത്തിവരുന്നതായും അവര് അറിയിച്ചു.
ആരോഗ്യ, അംഗനവാടി, ആശാ പ്രവര്ത്തകരെ പങ്കെടുപ്പിച്ചുകൊണ്ടാണ് പ്രതിരോധ കുത്തിവയ്പ്പ് ക്യാംപുകള് സംഘടിപ്പിക്കുന്നത്. തെറ്റിദ്ധാരണകളുടെയും അന്ധവിശ്വാസങ്ങളുടെയും പേരില് വരുംതലമുറയുടെ ആരോഗ്യം അപകടത്തിലാക്കുന്ന നിലപാടിനെതിരേ ശക്തമായ ബോധവല്ക്കരണം ആവശ്യമാണെന്നും അവര് അറിയിച്ചു.
