തളിപ്പറമ്പ്: പെരിഞ്ചല്ലൂരിന്റെ ലിഖിത ചരിത്ര ക്രോഡീകരണത്തിനായി രൂപീകരിച്ച ജനകീയ കൂട്ടായ്‌മയായ പെരിഞ്ചെല്ലൂര്‍ പോരിശയുടെ നേതൃത്വത്തില്‍ നടക്കുന്ന പെരിഞ്ചല്ലൂര്‍ പെരിയോര്‍കൂട്ടം 7ന് തളിപ്പറമ്പ് സീതി സാഹിബ് ഹയര്‍സെക്കണ്ടറി സ്‌കൂളില്‍ നടക്കും. കക്ഷി രാഷ്‌ട്രീയ ജാതി മത ചിന്തകള്‍ക്ക് അതീതമായി പ്രവര്‍ത്തിക്കുന്ന കൂട്ടായ്‌മയുടെ പ്രവര്‍ത്തനങ്ങളുടെ പ്രാഥമിക ഘട്ടമാണ് ഇത്.
മലയോര നഗരവും താലൂക്ക് ആസ്ഥാനവുമായ തളിപ്പറമ്പിന്റെ പ്രാചീന നാമമാണ് പെരിഞ്ചല്ലൂര്‍ ഒട്ടേറെ ഐതിഹ്യങ്ങള്‍ നിറഞ്ഞ തളിപ്പറമ്പിനെ പറ്റി ആധികാരികമായി രേഖപ്പെടുത്തപ്പെട്ട ഒരു ചരിത്രമില്ലെന്ന് മനസ്സിലാക്കിയാണ് ഒരുകൂട്ടം സാംസ്‌കാരിക പ്രവര്‍ത്തകര്‍ പെരിഞ്ചല്ലൂരിന്റെ ചരിത്രം പുതുതലമുറക്ക് പരിചയപ്പെടുത്താനായി കൂട്ടായ്‌മ രൂപീകരിച്ചിട്ടുള്ളത്. പെരിഞ്ചെല്ലൂര്‍ പോരിശ എന്ന വാട്‌സ് ആപ്പ് കൂട്ടായ്‌മയുടെ കീഴിലാണ് പ്രവര്‍ത്തനങ്ങള്‍ ഏകോപിപ്പിക്കുന്നത്. തളിപ്പറമ്പിന് പുറമെ അബൂദായിലും കൂട്ടായ്‌മ പ്രവര്‍ത്തിക്കുന്നുണ്ട്.
7ന് രാവിലെ 10 മുതല്‍നടക്കുന്ന പരിപാടിയില്‍ മുതിര്‍ന്ന പൗരന്മാരുടെ സംഗമമാണ് പ്രധാനമായും ലക്ഷ്യമിടുന്നത്. മുതിര്‍ന്ന പൗരന്മാരുടെ അനുഭവങ്ങള്‍പങ്കുവെക്കല്‍, കലാപരിപാടികള്‍ എന്നിവയും അരങ്ങേറും. പ്രമുഖര്‍ ചടങ്ങില്‍ പങ്കെടുക്കും. പഴമയുടെ പെരുമ വ്യക്തമാക്കുന്നതരത്തിലാണ് പ്രചാരണ രീതികളും വേദിയും സജ്ജീകരിച്ചരിക്കുന്നത്. കാളവണ്ടിയില്‍ അനൗണ്‍സ്‌മെന്റും പഴയ രാജവിളംബരത്തിന്റെ മാതൃകയിലുള്ള വിളംബരവും, വര്‍ണ്ണാഭമായ വിളംബര ജാഥയും നടത്തി.
