പയ്യന്നൂര്‍: ഹക്കീംവധവുമായി ബന്ധപ്പെട്ട് സിബിഐക്ക് നിര്‍ണ്ണായക വിവരങ്ങള്‍ ലഭിച്ചതായി സൂചന. സംഭവവുമായി ബന്ധപ്പെട്ട് കൂടുതല്‍ അറസ്റ്റുകള്‍ ഉടനെ ഉണ്ടാകുമെന്ന് കരുതുന്നു. കഴിഞ്ഞ ദിവസം സംഭവത്തില്‍ ഉള്‍പ്പെട്ട വിദേശ മലയാളിയെ നാട്ടില്‍വിളിച്ചുവരുത്തി സിബിഐ നടത്തിയ ചോദ്യം ചെയ്യലിലാണ് നിര്‍ണ്ണായകമായ നിരവധി വിവിരങ്ങള്‍ലഭിച്ചത്. കേസുമായി ബന്ധപ്പെട്ട് റിമാന്റില്‍ കഴിയുന്ന ഒരു പ്രതിയുടെ വീട്ടിലേക്ക് സംഭവ ദിവസം രാവിലെ വിദേശ മലയാളി പോകുന്നത് കണ്ടതായി അന്വേഷണ സംഘത്തിന് ബോധ്യമായതിനെ തുടര്‍ന്നാണ് ഗള്‍ഫിലുണ്ടായിരുന്ന ഇയാളെ സിബിഐ സംഘം വിളിച്ചുവരുത്തി ചോദ്യം ചെയ്തത്.
മുന്‍ പള്ളിക്കമ്മറ്റി അംഗമായ ഒരാളെയും ചോദ്യംചെയ്തിരുന്നു. കേസില്‍ തുടര്‍ അറസ്റ്റിന് സഹായകമാകുന്ന നിര്‍ണ്ണായക വിവരങ്ങള്‍ സിബിഐക്ക് ലഭിച്ചിട്ടുണ്ട്. അതോടൊപ്പം ഹക്കീമിന്റെ മൃതദേഹം മറവുചെയ്യുന്നതു സംബന്ധിച്ച് സംഭവദിവസമുണ്ടായ ചില അസ്വാരസ്യങ്ങളെക്കുറിച്ചും സിബിഐ സംഘത്തിന് വിവിരം ലഭിച്ചിട്ടുണ്ട്. ഇതിന്റെ അടിസ്ഥാനത്തില്‍ പ്രധാന കണ്ണിയായ ഒരാളെ കൂടി അടുത്തദിവസം ചോദ്യം ചെയ്യും. കൃത്യമായ തെളിവുകളുടെയും കൊലപാതകത്തിന് പിന്നിലെ ഇടപെടലുകളെയും കുറിച്ച് വ്യക്തത വരുത്തിയതിന് ശേഷം മാത്രമേ കൊലക്കുറ്റത്തിന് അറസ്റ്റ് നടത്തൂ എന്ന ഉറച്ച നിലപാടിലാണ് സിബിഐ സംഘം. അതേ സമയം സംഭവവുമായി ബന്ധപ്പെട്ട് റിമാന്റിലുള്ളവരുടെ കാലാവധി ഇന്നലെ അവസാനിച്ചിരുന്നു. ഇവരെ വീണ്ടും കോടതിയില്‍ ഹാജരാക്കി റിമാന്റ് കാലാവധി നീട്ടിയിട്ടുണ്ട്. ഇവര്‍ക്കായി തലശ്ശേരി സെഷന്‍സ് കോടതിയില്‍ നല്‍കിയ ജാമ്യാപേക്ഷ കഴിഞ്ഞ ദിവസം തള്ളിയിരുന്നു. ഇവര്‍ ഹൈക്കോടതിയെ സമീപിക്കാനുള്ള ശ്രമത്തിലാണ്.കോടതിയില്‍ ഇതുവരെയുള്ള അന്വേഷണ റിപ്പോര്‍ട്ടുകള്‍ മുഴുവന്‍ സിബിഐ സംഘം ഹാജരാക്കിയിട്ടുണ്ട്.
