കൊച്ചി: എറണാകുളം സര്ക്കാര് മെഡിക്കല് കോളേജില് സ്റ്റാഫ് നഴ്സിന്റെ അഭാവത്തില് മിനിമം വേതനം ലഭിക്കാതെ ജോലി ചെയ്തിരുന്ന നഴ്സുമാര്ക്ക് പ്രവൃത്തി പരിചയ സര്ട്ടിഫിക്കറ്റ് നല്കണമെന്ന് സംസ്ഥാന മനുഷ്യാവകാശ കമ്മിഷന്. മെഡിക്കല് വിദ്യാഭ്യാസ ഡയറക്ടര്ക്കാണ് നിര്ദ്ദേശം നല്കിയിരിക്കുന്നത്. 2012 മുതല് സ്റ്റാഫ് നഴ്സായി ജോലി ചെയ്തിരുന്നവര് നിമ്യമോഹന്റെ പരാതിയിലാണ് കമ്മീഷന് ആക്റ്റിംഗ് അദ്ധ്യക്ഷന് പി. മോഹനദാസിന്റെ ഉത്തരവ്.
2012 മുതല് 2013 വരെ ജോലി ചെയ്ത ശേഷവും ജീവനക്കാര് ഇല്ലാതിരുന്നതിനാല് ജോലിയില് തുടരാന് അനുവദിച്ചു. എറണാകുളം മെഡിക്കല് കോളേജ് സര്ക്കാര് ഏറ്റെടുത്തപ്പോള് തങ്ങളെയും സര്ക്കാര് ഏറ്റെടുക്കുമെന്ന ഉറപ്പിലാണ് ജോലി ചെയ്തതെന്ന് പരാതിക്കാര് അറിയിച്ചു. രണ്ട് കൊല്ലം മിനിമം വേതനം പോലും ലഭിക്കാതെ ജോലി ചെയ്തു. സ്ഥിരം ജീവനക്കാരുടെ സ്വാര്ത്ഥലാഭത്തിനുവേണ്ടിയാണ് മാസം 5000 രൂപ മാത്രം നല്കി തങ്ങളെ ജോലി ചെയ്യിപ്പിച്ചതെന്നും പരാതിയില് പറയുന്നു.
കമ്മീഷന് മെഡിക്കല് വിദ്യാഭ്യാസ ഡയറക്ടറില് നിന്ന് വിശദീകരണം തേടിയിരുന്നു. ദിവസവേതനക്കാരായ പരാതിക്കാര്ക്ക് ജോലി നല്കുന്നതിന് സര്ക്കാരിനോട് ശുപാര്ശ ചെയ്തിട്ടുണ്ടെന്നും സ്റ്റാഫ് നേഴ്സ് ടെയിനിമാരുടെ ശമ്പളം വര്ധിപ്പിക്കുന്ന മുറയ്ക്ക് പരാതിക്കാര്ക്കും വര്ധിപ്പിച്ച ശമ്പളം നല്കാമെന്നും റിപ്പോര്ട്ടില് പറയുന്നു.
പരാതിക്കാര് ജോലി ചെയ്തിരുന്ന മെഡിക്കല് കോളേജിലെ വിവിധ വിഭാഗങ്ങളില് നിന്ന് പ്രവൃത്തി പരിചയ സര്ട്ടിഫിക്കറ്റ് നല്കണമെന്ന് കമ്മീഷന് ആക്റ്റിംഗ് അദ്ധ്യക്ഷന് പി.മോഹനദാസ് നിര്ദ്ദേശിച്ചു.
