ന്യൂയോര്ക്ക്: ഒരു ലോകകപ്പ് കൂടി പടിയിറങ്ങുമ്പോള് ആഗോള ഫുട്ബോള് സംഘടനയായ ഫിഫയുടെ കീശയില് കോടികളുടെ കിലുക്കം. 15 ബില്യണ് ഡോളറാണ് പ്രതീക്ഷിക്കുന്ന വരുമാനമെന്ന് ഫിഫ ഔദ്യോഗികമായി പറയുന്നതെങ്കിലും അതിലും എത്രയോ കോടിക്കണക്കിനു ഡോളര് കൂടുതലായിരിക്കുമെന്നാണ് വിലയിരുത്തല്. ഫിഫയോട് സഹകരിച്ച എല്ലാവര്ക്കും കോടിക്കണക്കിന് രൂപയുടെ ലാഭമാണ് ഉണ്ടാകുന്നത്.
ബ്രോഡ്കാസ്റ്റര്മാരും പരസ്യവരുമാനവും
മത്സരങ്ങള് തത്സമയം സംപ്രേഷണം ചെയ്യുന്ന ടെലിവിഷന് ചാനലുകള്ക്ക് വന് ലാഭമാണ് ഇത്തവണ ലഭിക്കുന്നത്. യു.എസില് സംപ്രേഷണാവകാശം സ്വന്തമാക്കിയ ഫോക്സ് സ്പോര്ട്സ് ഇതിനായി ഏകദേശം 485 മില്യണ് (ഏകദേശം 4,666 കോടി ഇന്ത്യന് രുപ) ആണ് ചിലവഴിച്ചത്.
ഹൈഡ്രേഷന് ബ്രേക്കുകളിലെ പരസ്യങ്ങള്: യു.എസിലെ കഠിനമായ ചൂട് കാരണം കളിക്കാര്ക്ക് വെള്ളം കുടിക്കാനായി അനുവദിച്ച 90 സെക്കന്ഡ് ‘ഹൈഡ്രേഷന് ബ്രേക്കുകള്’ പരസ്യ കമ്പനികള്ക്ക് വലിയൊരു ചാകരയായി മാറി. ഫോക്സ് സ്പോര്ട്സില് ഒരു സാധാരണ 30 സെക്കന്ഡ് പരസ്യ സ്ലോട്ടിന് 200,000 മുതല് 300,000 ഡോളര് വരെയാണ് (ഏകദേശം 1.92 കോടി മുതല് 2.88 കോടി രൂപ) ഈടാക്കുന്നത്. യു.എസ്.എ ടീമിന്റെ മത്സരങ്ങളിലും നോക്കൗട്ട് ഘട്ടങ്ങളിലും ഇത് 750,000 (ഏകദേശം 7.21 കോടി രൂപ) വരെയായി ഉയര്ന്നു. ഈ ഹൈഡ്രേഷന് ബ്രേക്കുകളിലെ പരസ്യങ്ങള് വഴി മാത്രം യു.എസില് നിന്ന് 250 മില്യണ് (ഏകദേശം 2,405 കോടി രൂപ) വരുമാനം നേടാനാകുമെന്നാണ് കണക്കുകൂട്ടല്.
വന്കിട സ്പോണ്സര്മാര്: അഡിഡാസ,് കോക്കകോള തുടങ്ങിയ ഔദ്യോഗിക സ്പോണ്സര്മാര്ക്ക് വലിയ വിപണി നേട്ടമാണ് ലഭിക്കുന്നത്. ഉദാഹരണത്തിന്, അഡിഡാസ് തങ്ങളുടെ ‘ബാക്ക്യാര്ഡ് ലെജന്ഡ്സ്’ (ലയണല് മെസി, ജൂഡ് ബെല്ലിംങ്ങാം, ലാമിന് യമാല് എന്നിവര് അഭിനയിച്ചത്) എന്ന പരസ്യ പ്രചാരണത്തിനായി മാത്രം 50 മില്യണ് ഡോളര് (ഏകദേശം 623 കോടി രൂപ) ആണ് ചിലവഴിച്ചത്.
പ്രാദേശിക ടൂറിസം മേഖല: അമേരിക്ക, കാനഡ, മെക്സിക്കോ എന്നീ രാജ്യങ്ങളിലെ 16 ആതിഥേയ നഗരങ്ങളിലെ ഹോട്ടലുകള്, റെസ്റ്റോറന്റുകള് എന്നിവയ്ക്ക് ആരാധകരുടെ വരവ് മൂലം വലിയ ബിസിനസ്സ് ലഭിച്ചു
ആതിഥേയ നഗരങ്ങളുടെ സമ്പദ്വ്യവസ്ഥ: ലോകകപ്പ് വഴി ആഗോള സമ്പദ്വ്യവസ്ഥയ്ക്ക് 41 ബില്യണ് ഡോളറും യു.എസ് സമ്പദ്വ്യവസ്ഥയ്ക്ക് മാത്രം 17 ബില്യണ് ഡോളറും (ഏകദേശം 1.63 ലക്ഷം കോടി രൂപ) അധികമായി ലഭിക്കുമെന്നും, 185,000 തൊഴിലവസരങ്ങള് സൃഷ്ടിക്കപ്പെടുമെന്നുമായിരുന്നു ഫിഫയുടെ കണക്കുകൂട്ടല്. എന്നാല് ഓക്സ്ഫോര്ഡ് യൂണിവേഴ്സിറ്റിയിലെ വിദഗ്ദ്ധനായ അലക്സാണ്ടര് ബുഡ്സിയറുടെ അഭിപ്രായത്തില്, ദീര്ഘകാലാടിസ്ഥാനത്തില് ഈ നഗരങ്ങള്ക്ക് സാമ്പത്തിക നേട്ടം വളരെ കുറവാണ്. സാധാരണ ഒളിംപിക്സോ ലോകകപ്പോ നടക്കുമ്പോള് പുതിയ സ്റ്റേഡിയങ്ങളും അടിസ്ഥാന സൗകര്യങ്ങളും നിര്മ്മിക്കുന്നത് വഴി ആ നഗരങ്ങളില് വലിയ വികസനവും സാമ്പത്തിക ചലനവുമുണ്ടാകും. എന്നാല് ഇത്തവണ നിലവിലുള്ള സ്റ്റേഡിയങ്ങളും ഹോട്ടലുകളുമാണ് ഉപയോഗിച്ചത് എന്നതിനാല് അത്തരം വലിയ വികസന നേട്ടങ്ങള് നഗരങ്ങള്ക്ക് ലഭിച്ചില്ല.
താല്ക്കാലിക തൊഴിലുകള്
മാത്രം: മെയ് മാസത്തോടെ പബ്ബുകളിലും ഹോട്ടലുകളിലും ജീവനക്കാരുടെ എണ്ണം വര്ദ്ധിച്ചെങ്കിലും ഇവയെല്ലാം കുറഞ്ഞ ശമ്പളമുള്ള താല്ക്കാലിക ജോലിക്കാര് മാത്രമായിരുന്നു. ഇത് ജനങ്ങളിലേക്ക് ശാശ്വതമായ സാമ്പത്തിക ഭദ്രത എത്തിച്ചില്ല. കൂടാതെ, ലോകകപ്പ് തിരക്ക് കാരണം മറ്റ് സാധാരണ വിനോദസഞ്ചാരികള് ഈ നഗരങ്ങള് ഒഴിവാക്കിയത് പ്രാദേശിക ബിസിനസ്സുകളെ ചെറിയ രീതിയില് ബാധിക്കുകയും ചെയ്തു.
