കൊച്ചി: സമൂഹസേവന രംഗത്ത് സേവാഭാരതി രാജ്യത്തിന് മാതൃകയാകുന്ന പ്രവര്ത്തനങ്ങളാണ് കാഴ്ചവെക്കുന്നതെന്നും സമാജസേവനത്തില് സംഘടന ബഹുദൂരം മുന്നോട്ടുപോയിട്ടുണ്ടെന്നും സീമാ ജാഗരണ് മഞ്ച് ദേശീയ സംരക്ഷക് എ. ഗോപാലകൃഷ്ണന്.
എറണാകുളം ഭാസ്കരീയം കണ്വെന്ഷന് സെന്ററില് നടന്ന ദേശീയ സേവാഭാരതിയുടെ ‘സുകൃത സംഗമത്തില് സമാപന സന്ദേശം നല്കുകയായിരുന്നു അദ്ദേഹം.
സമൂഹത്തിലെ ദുരിതമനുഭവിക്കുന്നവരിലേക്ക് സ്നേഹത്തിന്റെയും സേവനത്തിന്റെയും കരങ്ങള് നീട്ടുന്ന പ്രവര്ത്തനങ്ങളാണ് സേവാഭാരതി രാജ്യത്തുടനീളം നടത്തുന്നതെന്ന് അദ്ദേഹം പറഞ്ഞു. ജാതി, മതം, രാഷ്ട്രീയ വ്യത്യാസങ്ങള്ക്കതീതമായി ദുരിതബാധിതര്ക്കും രോഗികള്ക്കും വയോജനങ്ങള്ക്കും ആശ്വാസമേകുന്ന സേവനങ്ങളിലൂടെ സംഘടന ജനവിശ്വാസം നേടിയെടുത്തിട്ടുണ്ടെന്നും അദ്ദേഹം ചൂണ്ടിക്കാട്ടി.
സമൂഹത്തില് സേവനസന്നദ്ധത വളര്ത്തിയെടുക്കുന്നതില് സന്നദ്ധപ്രവര്ത്തകരുടെ പങ്ക് നിര്ണായകമാണെന്നും സേവാഭാരതിയുടെ പ്രവര്ത്തനങ്ങള് കൂടുതല് ഗ്രാമങ്ങളിലേക്കും നഗരങ്ങളിലേക്കും വ്യാപിപ്പിക്കേണ്ടത് കാലത്തിന്റെ ആവശ്യമാണെന്നും അദ്ദേഹം പറഞ്ഞു. ദുരിതമനുഭവിക്കുന്നവരുടെ ജീവിതത്തില് പ്രതീക്ഷയുടെ വെളിച്ചം പകരുന്ന പ്രവര്ത്തനങ്ങള് തുടര്ന്നും ശക്തിപ്പെടുത്തണമെന്നും അദ്ദേഹം ആഹ്വാനം ചെയ്തു.
രാജ്യനിര്മാണത്തില് സേവനപ്രവര്ത്തനങ്ങള്ക്ക് വലിയ പ്രാധാന്യമുണ്ടെന്നും മനുഷ്യസ്നേഹവും സാമൂഹിക പ്രതിബദ്ധതയും ഉയര്ത്തിപ്പിടിച്ചുകൊണ്ടുള്ള പ്രവര്ത്തനങ്ങളാണ് സമൂഹത്തിന്റെ യഥാര്ത്ഥ കരുത്തെന്നും എ. ഗോപാലകൃഷ്ണന് പറഞ്ഞു.
ചടങ്ങില് സേവാഭാരതി പാലിയേറ്റീവ് പ്രവര്ത്തനങ്ങള്ക്കായി 110 വാഹനങ്ങള് നല്കിയ സേവാഭക്തി ഫൗണ്ടേഷന് ചെയര്മാന് സി.എസ്. മോഹനനെ ആദരിച്ചു. മാതൃകാ വാളണ്ടിയറായ തിരുവനന്തപുരം അഴൂര് യൂണിറ്റ് സെക്രട്ടറി എല്. ബിന്ദുവിന് ഭാസ്കര് ജ്യോതി സേവാപുരസ്കാരം ആര്എസ്എസ് ക്ഷേത്രീയ സേവാ പ്രമുഖ് പി.എന്. രവികുമാര് സമ്മാനിച്ചു. മാതൃകാ നഴ്സിനുള്ള ഭഗിനി നിവേദിതാ പുരസ്കാരം പാലക്കാട് ടൗണ് യൂണിറ്റിലെ ടി. അജിതയ്ക്ക് ഡോ. ജേക്കബ് തോമസ് സമ്മാനിച്ചു.
മികച്ച മാതൃകാ യൂണിറ്റിനുള്ള പുരസ്കാരം കൊയിലാണ്ടി യൂണിറ്റിന് സീമാ ജാഗരണ് മഞ്ച് ദേശീയ സംരക്ഷക് എ. ഗോപാലകൃഷ്ണന് സമ്മാനിച്ചു.
സുകൃത സംഗമം സോവനീര് പ്രകാശനം അമൃത ഹോസ്പിറ്റല് പാലിയേറ്റീവ് വിഭാഗം അസോസിയേറ്റ് പ്രൊഫസര് ഡോ. രാജശ്രീ നിര്വഹിച്ചു.
ദേശീയ സേവാഭാരതിയുടെ നേതൃത്വത്തില് സംഘടിപ്പിച്ച സുകൃത സംഗമത്തില് വിവിധ സാമൂഹിക, സേവന മേഖലകളിലെ പ്രവര്ത്തകരും സന്നദ്ധപ്രവര്ത്തകരും പങ്കെടുത്തു. സേവനരംഗത്ത് കൂടുതല് സജീവമായി പ്രവര്ത്തിക്കാനുള്ള പ്രതിജ്ഞയോടെയാണ് സംഗമം സമാപിച്ചത്.
