കണ്ണാടിപ്പറമ്പ്: കണ്ണാടിപ്പറമ്പില് ബിജെപി നേതാവിന്റെ വീടിന് നേരെ കോണ്ഗ്രസ്-എസ്ഡിപിഐ അക്രമം. വീട്ടുമുറ്റത്ത് നിര്ത്തിയിട്ട വാഹനങ്ങള് അടിച്ചുതകര്ത്തു. ബിജെപി നാറാത്ത് പഞ്ചായത്ത് ജനറല് സെക്രട്ടറി ആനയോടന് സുമേഷിന്റെ വീടിന് നേരെയണ് ഇന്നലെ പുലര്ച്ചെ അക്രമണമുണ്ടായത്. പുലര്ച്ചെ മൂന്നോടെ വാഹനത്തിലെത്തിയ സംഘം അക്രമം നടത്തുകയായിരുന്നു. വീട്ടുമുറ്റത്ത് നിര്ത്തിയിട്ടിരുന്ന ഗുഡ്സ് ഓട്ടോറിക്ഷ പൂര്ണ്ണമായും അടിച്ചുതകര്ത്തു. സമീപത്തുണ്ടായിരുന്ന ബൈക്കും തകര്ത്തു. വീടിന്റെ ജനലും വാതിലും അക്രമിസംഘം തകര്ത്തു. ബഹളം കേട്ട് വീട്ടുകാര് ഉണര്ന്നപ്പോള് അക്രമികള് രക്ഷപെട്ടു. കോണ്ഗ്രസ്-എസ്ഡിപിഐ പ്രവര്ത്തകരായ ഫവാസ്, അജ്മല്, നിസ്സാം എന്നിവരുടെ നേതൃത്വത്തിലുള്ള സംഘമാണ് അക്രമം നടത്തിയത്.
സുമേഷ്, സഹോദരന് രൂപേഷ്, അമ്മ എന്നിവരായിരുന്നു വീട്ടിലുണ്ടായിരുന്നത്. കഴിഞ്ഞ ദിവസം കോണ്ഗ്രസുകാര് പ്രകടനമായെത്തി വീടിന് നേരെ കല്ലേറ് നടത്തിയിരുന്നു. മയ്യില് പോലീസ് സംഭവസ്ഥലത്തെത്തി പരിശോധന നടത്തി. ബിജെപി നേതാക്കളായ കെ.എന്.മുകുന്ദന്, രത്നാകരന് തുടങ്ങി നേതാക്കള് സ്ഥലം സന്ദര്ശിച്ചു. സംഭവത്തില് ബിജെപി അഴീക്കോട് മണ്ഡലം കമ്മിറ്റിയും നാറാത്ത് പഞ്ചായത്ത് കമ്മിറ്റിയും പ്രതിഷേധിച്ചു.
