വിളപ്പില് : നടന് ജഗതി നല്കിയ ഫലവൃക്ഷ വിത്തുകള് മലയാളത്തിന്റെ പ്രിയ കവി പ്രൊഫ വി.മധുസൂദനന് നായര് ഏറ്റുവാങ്ങി. കാട്ടാക്കട നിയോജക മണ്ഡലത്തിലെ വറ്റാത്ത ഉറവയ്ക്കായ് ജലസമൃദ്ധി പദ്ധതിയുടെ ഭാഗമായി ‘ലക്ഷം വൃക്ഷം ലക്ഷ്യം’ പദ്ധതിക്കാണ് വിഷു ദിനത്തില് കവിയും നടനും ചേര്ന്ന് തുടക്കമിട്ടത്. പേയാടുള്ള ജഗതി ശ്രീകുമാറിന്റെ വീട്ടിലായിരുന്നു പദ്ധതിയുടെ ഉദ്ഘാടനം.
മനുഷ്യന് മണ്ണില് നിന്നും ഏറെ അകന്നുപോയെന്നും ഒരു നല്ല മരം നടുന്നതാണ് ഇക്കാലത്തെ ഏറ്റവും വലിയ വികസനമെന്നും മധുസൂധനന് നായര് പറഞ്ഞു. ഒരോ വാര്ഡിലും 150 വീടുകളില് വീതം വിഷുദിനത്തില് തൊഴിലുറപ്പ് തൊഴിലാളികളുടെ സഹായത്തോടെ വിത്തുകള് പാകി. കുടുംബശ്രീ യൂണിറ്റുകളുടെ നേതൃത്വത്തില് വൃക്ഷതൈകള് പരിപാലിക്കും. ജൂണ് 5 ന് ലോക പരിസ്ഥിതി ദിനത്തില് ഒരു ലക്ഷം ഫലവൃക്ഷ തൈകള് മണ്ഡലത്തിലാകെ വളര്ത്തിയെടുത്ത് പദ്ധതി പൂര്ണതയില് എത്തിക്കും. കാട്ടാക്കട മണ്ഡലത്തിലെ അഞ്ച് പഞ്ചായത്തുകളിലും പദ്ധതി ആരംഭിച്ചു. മലയിന്കീഴ് പഞ്ചായത്ത് പ്രസിഡന്റ് ചന്ദ്രന്നായര് മാറനല്ലുര് പഞ്ചായത്ത് പ്രസിഡന്റ് കുമാരി പി.എസ് മായ, മറ്റ് ജനപ്രതിനിധികള് എന്നിവര് പരിപാടികളില് പങ്കെടുത്തു.
