തൃപ്പൂണിത്തുറ: വ്യാജരേഖകള് ചമച്ച് കൊച്ചി ദേവസ്വത്തിന്റെയും സ്വകാര്യ വ്യക്തിയുടെയും പേരിലുള്ള ഭൂമി കൈയ്യേറാന് ഭൂമാഫിയ ശ്രമിക്കുന്നതായി പരാതി. കുരീക്കാട് കണിച്ചിറ കോളനിയില് പട്ടികജാതിവിഭാഗത്തില്പ്പെട്ട കണിച്ചിറ വീട്ടില് ഉണ്ണികൃഷ്ണനും സഹോദരങ്ങള്ക്കും അവകാശപ്പെട്ടതും കൂടാതെ ഇതിനോട് ബന്ധപ്പെട്ട് കിടക്കുന്ന കൊച്ചി ദേവസ്വത്തിന്റെയും ഭൂമിയാണ് കൈയ്യേറാന് ശ്രമിക്കുന്നത്.
ഉണ്ണികൃഷ്ണന്റെ പൂര്വ്വികര് പന്ത്രണ്ട് ഏക്കറോളം ഭൂമി ചോറ്റാനിക്കര ദേവി ക്ഷേത്രത്തിന് പതിച്ചു നല്കിയിരുന്നു. ഈ ഭൂമി ഉള്പ്പെടെ മുപ്പത്തിരണ്ട് ഏക്കര് ഭൂമിയാണ് കൈയ്യേറ്റത്തിനായി ശ്രമിക്കുന്നത്. അനധികൃതമായി ഭൂമിയില് പ്രവേശിക്കുന്നതിനെതിരെ ദേവസ്വം ബോര്ഡ് കോടതിയില് നിന്ന് വിധി സമ്പാദിച്ചിരുന്നു. ഈ വിധി നിലനില്ക്കെയാണ് ഭൂമാഫിയയുടെ ആളുകള് സ്വകാര്യ റീ സര്വ്വേയറെ കൊണ്ട് സ്ഥലത്ത് പോലീസ് സാന്നിധ്യത്തില് അതിക്രമിച്ച് കയറിയത്. ഇവിടെയുള്ള കാവിലെ ചിത്രകൂട കല്ലും, മറ്റു വിഗ്രഹങ്ങളും നശിപ്പിച്ചു. ഇതിനെതിരെ ഉണ്ണികൃഷ്ണന്റെ നേതൃത്വത്തില് ചോറ്റാനിക്കര പോലീസില് പരാതി നല്കിയെങ്കിലും നടപടികള് ഉണ്ടായിട്ടില്ല.
രാഷ്ടീയ സ്വാധീനങ്ങള് ചെലുത്തിയാണ് വ്യാജരേഖകള് ചമച്ച് ഭൂമി തട്ടിയെടുക്കാന് ഭൂമാഫിയ ശ്രമിക്കുന്നത് എന്ന പരാതിയും നിലനില്ക്കുന്നുണ്ട്.
