കൊല്ലം: പഴയ ദേശീയ ഗ്രാമീണ തൊഴിലുറപ്പ് പദ്ധതിക്ക് പകരം ജൂലൈ 1 മുതല് നടപ്പിലാക്കിവരുന്ന കേന്ദ്രാവിഷ്കൃത തൊഴിലുറപ്പ് പദ്ധതിയായ വിബി – ജി റാം ജി യില് കഴിഞ്ഞദിവസം വരെ സംസ്ഥാനത്ത് സൃഷ്ടിച്ചത് 12.12 ലക്ഷം തൊഴില് ദിനങ്ങള്. തൊഴില് ദിനങ്ങളില് 17.6 ശതമാനം പട്ടികജാതി വിഭാഗങ്ങള്ക്കും 4.89 ശതമാനം പട്ടികവര്ഗ വിഭാഗങ്ങള്ക്കും ലഭിച്ചു.
പദ്ധതിയില് 90 ശതമാനത്തോളം തൊഴില് ലഭിച്ചിട്ടുള്ളത് സ്ത്രീജനങ്ങള്ക്കാണ്. 19 ദിവസം കൊണ്ട് ഒരു കുടുംബത്തിന് ശരാശരി ആറ് തൊഴില് ദിനങ്ങള് നല്കാനും സാധിച്ചു. പദ്ധതിയില് രജിസ്റ്റര് ചെയ്തിട്ടുള്ളതില് തൊഴില് ആവശ്യപ്പെടുന്ന കുടുംബങ്ങള്ക്ക് പ്രതിവര്ഷം 125 ദിവസമാണ് തൊഴിലുറപ്പായി ലഭിക്കുക. ഈ സാമ്പത്തികവര്ഷം പഴയ തൊഴിലുറപ്പ് പദ്ധതിയില് ലഭിച്ച തൊഴില് ദിനങ്ങളുടെ ബാക്കി തൊഴില്ദിനങ്ങള് 125 ദിവസം എന്ന പരിധിക്ക് വിധേയമായി തൊഴില് ആവശ്യപ്പെടുന്നവര്ക്ക് ലഭിക്കും. സംസ്ഥാനത്തെ 941 ഗ്രാമപഞ്ചായത്തുകളിലാണ് പദ്ധതി നടപ്പാക്കിവരുന്നത്.
സംസ്ഥാനത്ത് പദ്ധതിയില് രജിസ്റ്റര് ചെയ്തിട്ടുള്ളത് 40.61 ലക്ഷം കുടുംബങ്ങളിലെ 59.69 ലക്ഷം തൊഴിലാളികളാണ്. ഇതില് 17.66 ലക്ഷം കുടുംബങ്ങളിലെ 20.45 ലക്ഷം തൊഴിലാളികള് പദ്ധതിയില് സജീവമായി തൊഴിലെടുക്കുന്നവരാണ്. വിബി- ജി റാം ജിയില് കഴിഞ്ഞദിവസം വരെ 2.15 ലക്ഷം കുടുംബങ്ങളിലെ 2.25 ലക്ഷം തൊഴിലാളികളാണ് ജോലിക്ക് എത്തിയത്.
തൊഴിലിനൊപ്പം, നാല് പ്രധാന മേഖലകളില് ശ്രദ്ധകേന്ദ്രീകരിച്ച് ശക്തവും ദീര്ഘകാലം നിലനില്ക്കുന്നതുമായ ഗ്രാമീണ അടിസ്ഥാനസൗകര്യ ആസ്തികള് സൃഷ്ടിക്കാനും പദ്ധതി ലക്ഷ്യമിടുന്നു.
ജലസുരക്ഷ, റോഡ് തുടങ്ങിയ ഗ്രാമീണ അടിസ്ഥാന സൗകര്യങ്ങള്, പാര്ശ്വവത്കരിക്കപ്പെട്ടവര്ക്കും പട്ടിക വിഭാഗങ്ങള്ക്കും മുന്ഗണന നല്കിക്കൊണ്ട് ഉപജീവനവുമായി ബന്ധപ്പെട്ട അടിസ്ഥാന സൗകര്യങ്ങള് ഒരുക്കുക, കാലാവസ്ഥാ പ്രതിരോധത്തിനുള്ള പ്രത്യേക പ്രവൃത്തികള് എന്നിവയാണ് പദ്ധതിയില് ഊന്നല് നല്കുന്നത്. ഗ്രാമപഞ്ചായത്ത് തലത്തില് തയാറാക്കുന്ന വികസിത ഗ്രാമപഞ്ചായത്ത് പ്ലാന് അനുസരിച്ചാണ് പുതിയ പദ്ധതിയിലെ പ്രവൃത്തികള്.
ജന്മഭൂമി ഓണ്ലൈന്