സ്വന്തം ലേഖകന്
വിളപ്പില്: ‘അരുത്, ഇനിയും ഞങ്ങള് ബാല്യങ്ങളുടെ കണ്ണു നനയ്ക്കരുത്. ജീവിക്കാനുള്ള ഞങ്ങളുടെ അവകാശത്തെ അംഗീകരിക്കണം. ബാല പീഡനങ്ങള് ഇല്ലാത്തൊരു ലോകത്തിനായി നമുക്ക് ഒരുമിക്കാം.’ കുരുന്നു ഭാവനയില് വിരിഞ്ഞ ആ ഓര്മപ്പെടുത്തലുകള് കിള്ളിയിലെ ചുണക്കുട്ടികളെ പൊതുവിദ്യാഭ്യാസവകുപ്പും സര്വ്വശിക്ഷാ അഭിയാനും ചേര്ന്ന് സംഘടിപ്പിച്ച മികവ് 2017 ലെ മിന്നും താരങ്ങളാക്കി.
തിരുവനന്തപുരം മോഡല് എല്പി സ്കൂളില് നടന്ന ജില്ലാതല മികവുത്സവത്തില് ഇംഗ്ലീഷ് ടോക് ഷോയിലൂടെയാണ് കാട്ടാക്കട കിള്ളി എംപിഎം എല്പി സ്കൂളിലെ കുരുന്നുകള് വിജയകിരീടം ചൂടിയത്. കഴിഞ്ഞവര്ഷവും ഇ#ോതേ സ്കൂളിലെ കുട്ടികളായിരുന്നു വിജയികള്. പഞ്ചായത്ത്, താലൂക്കുതല മത്സരങ്ങളില് വിജയിച്ചാണ് ഇവര് ജില്ലയില് മാറ്റുരച്ചത്. ബാലപീഡനം എന്ന വിഷയത്തെ ആസ്പദമാക്കിയായിരുന്നു ടോക് ഷോ.
പീഡന കേസുകളിലെ പ്രതികളുടെ മുഖം മറയ്ക്കരുത്, അവരെ ഞങ്ങള്ക്ക് തിരിച്ചറിയണം, പണത്തിനു വേണ്ടി പ്രതികളെ കള്ളത്തെളിവുകളുണ്ടാക്കി രക്ഷിക്കുന്ന വക്കീലന്മാരെ സമൂഹം ഒറ്റപ്പെടുത്തണം, ബാലപീഡനത്തിന് ശിക്ഷ കഠിനമാക്കണം തുടങ്ങി വേറിട്ട് ആശയങ്ങള് അവതരിപ്പിച്ചാണ് ഗ്രാമീണ മേഖലയിലെ ഈ കുട്ടികള് മേളയില് വിജയക്കൊടി പാറിച്ചത്. ആര്ദ്ര, വിഷ്ണു, അനില, അസിയ എന്നിവരുടെ നേതൃത്വത്തില് പതിനൊന്ന് വിദ്യാര്ഥികളാണ് മികവില് മത്സരാര്ഥികളായി എത്തിയത്. നാടിന്റെ അഭിമാനമായി മാറിയ കുട്ടികളെ അനുമോദിക്കാന് ഒരുങ്ങുകയാണ് നാട്ടുകാരും സ്കൂള് അധികൃതരും.
