കഞ്ചിക്കോട്: ജനവാസമേഖലയില് പ്രവര്ത്തിക്കുന്ന സ്വകാര്യ ഇരുമ്പുരുക്ക് കമ്പനിയിലുണ്ടായ നേരിയ പൊട്ടിത്തെറിയില് മൂന്നു ഇതര സംസ്ഥാന തൊഴിലാളികള്ക്ക് പരുക്ക്.
സമീപവാസികളുടെ പരാതിയിലും കമ്പനിക്കു മുന്നില് നടന്ന പ്രതിഷേധത്തിനും ഒടുവില് പോലീസും ഫാക്ടറീസ് ആന്ഡ് ബോയിലേഴ്സ് വകുപ്പ് അധികൃതരും സ്ഥലത്തെത്തി പരിശോധന നടത്തി.ഫാക്ടറീസ് ആന്ഡ് ബോയിലേഴ്സ് വകുപ്പ് ഉത്തരവിനെ തുടര്ന്ന് കമ്പനിയുടെ പ്രവര്ത്തനം നിര്ത്തിവച്ചു.
ജീവനക്കാരുടെ സുരക്ഷ ഉറപ്പാക്കാതെ കമ്പനി പ്രവര്ത്തനം നടത്തരുതെന്നും നിര്ദേശം നല്കി. അതേസമയം ആരോപണങ്ങള് അടിസ്ഥാന രഹിതമാണെന്നും പ്രചരിക്കുന്നതു പോലെ അപകടം കമ്പനിക്കുള്ളില് ഉണ്ടായിട്ടില്ലെന്നും കമ്പനി അധികൃതര് വിശദീകരിച്ചു.
കമ്പനിയിലുണ്ടായിരുന്ന ജീവനക്കാരുടെ വിവരങ്ങളും പോലീസിനു ഇവര് കൈമാറിയിട്ടുണ്ട്.വിവരമറിഞ്ഞെത്തിയ ലീഡിങ് ഫയര്മാന് ബെന്നി കെ.ആന്ഡ്രൂസിന്റെ നേതൃത്വത്തിലുള്ള അഗ്നിശമനസേന കമ്പനിക്ക് അകത്തു പരിശോധന നടത്തി.
വലിയൊരു പൊട്ടിത്തെറിയുണ്ടായിട്ടില്ലെന്നും അഗ്നിശമനസേന അധികൃതരും അറിയിച്ചു. പരുക്കേറ്റ ജീവനക്കാരെ കോയമ്പത്തൂരിലെ സ്വകാര്യ ആശുപത്രിയിലായി പ്രവേശിപ്പിച്ചെന്നു വിവരമുണ്ടെങ്കിലും ഇവരുടെ പേരുവിവരങ്ങള് വ്യക്തമായിട്ടില്ല.
ഇന്നലെ പുലര്ച്ച അഞ്ചരയോടെയാണ് ഇരുമ്പുരുക്കുന്ന ഫര്ണസിലെ കോയല് പൊട്ടിയത്. മൂന്നുതവണ പൊട്ടിത്തെറി ശബ്ദം കേട്ടെന്നും ഇരുമ്പുപാളികള് കമ്പനിയ്ക്കു പുറത്തേക്കും തെറിച്ചെന്നും പരിസരവാസികള് ആരോപിച്ചു.
സമീപ പ്രദേശത്തെ വീടുകളിലെ പാത്രങ്ങളും ഉപകരണങ്ങളും സ്ഫോടനത്തിന്റെ ആഘാതത്തില് തെറിച്ചുപോയെന്നും പറയുന്നു.
ജില്ലാ പൊലീസ് മേധാവി പ്രതീഷ്കുമാര്, എഎസ്പി ജി.പൂങ്കുഴലി, കസബ സിഐ ആര്.ഹരിപ്രസാദ്, ഫാക്ടറീസ് ആന്ഡ് ബോയിലേഴ്സ് വകുപ്പ് ഇന്സ്പെക്ടര് എന്.ജെ.മുനീര് എന്നിവരുടെ നേതൃത്വത്തില് സംഭവ സ്ഥലത്തും കമ്പനിക്കുള്ളിലും പരിശോധന നടത്തി.
ഫര്ണസിലെ തകരാറുമൂലം കോയിലുകള് പൊട്ടിത്തെറിക്കുകയായിരുന്നെന്നാണ് നിഗമനം. കമ്പനിക്കു ചുറ്റിലും പരിസരത്തുമായി രണ്ടായിരത്തിലേറെ കുടുംബങ്ങളാണ് താമസിക്കുന്നത്. സംഘര്ഷാവസ്ഥ കണക്കിലെടുത്ത് എസ്ഐ റിന്സണ് എം.തോമസിന്റെ നേതൃത്വത്തിലുള്ള കസബ പൊലീസ് സ്ഥലത്ത് കനത്ത സുരക്ഷയൊരുക്കി.
