ആലപ്പുഴ: വാര്ഷിക പദ്ധതി നിര്വഹണത്തില് ജില്ലയിലെ തദ്ദേശസ്വയംഭരണ സ്ഥാപനങ്ങളുടെ പ്രകടനം പരിതാപകരം. ഇന്നലെ വരെ ചെലവഴിച്ചത് അനുവദിച്ചതിന്റെ 38 ശതമാനം തുക മാതം. ജില്ലാ ആസൂത്രണസമിതി യോഗം പദ്ധതി നിര്വഹണ പുരോഗതി വിലയിരുത്തി.
ജില്ലാ പഞ്ചായത്ത് 36.17 ശതമാനവും നഗരസഭകള് 26.40 ശതമാനവും ബ്ലോക്ക് പഞ്ചായത്തുകള് 43.37 ശതമാനവും ഗ്രാമപഞ്ചായത്തുകള് 40.27 ശതമാനവും ചെലവഴിച്ചു. 72 ഗ്രാമപഞ്ചായത്തുകള്ക്കായി ബജറ്റ് പ്രകാരം അനുവദിച്ച 19,867.07 ലക്ഷം രൂപയില് 8,108.18 ലക്ഷം രൂപ ചെലവഴിച്ചിട്ടുണ്ട്. 12 ബ്ലോക്ക് പഞ്ചായത്തുകള് 1,841.25 ലക്ഷം രൂപ ചെലവഴിച്ചു. 4,167.29 ലക്ഷം രൂപയാണ് ബ്ലോക്കുകള്ക്ക് അനുവദിച്ചത്. ആറു നഗരസഭകള്ക്കായി അനുവദിച്ച 7,766.85 ലക്ഷം രൂപയില് 2,050.10 ലക്ഷം രൂപ ചെലവഴിച്ചു.
ഗ്രാമപഞ്ചായത്തുകളില് 68.26 ശതമാനം ചെലവഴിച്ച് മാരാരിക്കുളം വടക്ക് പഞ്ചായത്താണ് മുന്നില്. പെരുമ്പളം, കാവാലം, അമ്പലപ്പുഴ വടക്ക് പഞ്ചായത്തുകള് 60 ശതമാനത്തിനു മുകളില് പുരോഗതി കൈവരിച്ചു. 14 പഞ്ചായത്തുകള് 50 ശതമാനത്തിനു മുകളില് നേട്ടം കൈവരിച്ചപ്പോള് ഏഴു പഞ്ചായത്തുകള് 30 ശതമാനത്തിനു താഴെയാണ് പുരോഗതി കൈവരിച്ചിട്ടുള്ളത്. മുതുകുളം, മുട്ടാര് പഞ്ചായത്തുകളാണ് ഏറ്റവും പിന്നില്.
ബ്ലോക്ക് പഞ്ചായത്തുകളില് 54.80 ശതമാനം ചെലവഴിച്ച തൈക്കാട്ടുശേരിയാണ് മുന്നില്. പട്ടണക്കാട് 52.86 ഉം കഞ്ഞിക്കുഴി 52.05 ശതമാനവും ചെലവഴിച്ചിട്ടുണ്ട്. അഞ്ച് ബ്ലോക്ക് പഞ്ചായത്തുകള് 40 ശതമാനത്തിനു താഴെയാണ് ചെലവഴിച്ചത്.
നഗരസഭകളില് ഹരിപ്പാടാണ് മുന്നില് 51.79 ശതമാനം. ആലപ്പുഴ-28.75, ചേര്ത്തല-27.93, കായംകുളം-23.93, മാവേലിക്കര-23.06, ചെങ്ങന്നൂര്-14.13 എന്നിങ്ങനെയാണ് പുരോഗതി. ഫിഷറീസ്, മൃഗസംരക്ഷണം, തദ്ദേശസ്വയംഭരണ എന്ജിനീയറിങ് വിഭാഗം എന്നീ വകുപ്പുകള് വഴിയുള്ള പദ്ധതി നിര്വഹണം വേഗത്തിലാക്കാന് യോഗം നിര്ദ്ദേശം നല്കി. റോഡ് നിര്മ്മാണമടക്കമുള്ള പ്രവൃത്തികള് അടുത്തയാഴ്ച പൂര്ത്തീകരിക്കുന്നതോടെ 70 ശതമാനത്തോളം തുക ചെലവഴിക്കാനാകുമെന്നാണ് പ്രതീക്ഷ. ജില്ലാ പഞ്ചായത്ത് പ്രസിഡന്റ് ജി. വേണുഗോപാല് അദ്ധ്യക്ഷത വഹിച്ചു.
