മദ്യവിമുക്ത ഉത്സവത്തിന് സര്‍വ്വകക്ഷി ആഹ്വാനം

മുഴപ്പിലങ്ങാട്: ഉത്സവത്തിനും മറ്റ് ആഘോഷ വേളകളിലും മദ്യം ഒഴിവാക്കണമെന്ന് മുഴപ്പിലങ്ങാട് ശ്രീ കൂര്‍മ്പ ഭഗവതി ക്ഷേത്ര താലപ്പൊലി മഹോത്സവം സമാധാനപൂര്‍ണ്ണമാക്കുന്നതിനെക്കുറിച്ചാലോചിക്കുവാന്‍ കണ്ണൂര്‍ സിറ്റി സര്‍ക്കിള്‍ ഇന്‍സ്‌പെക്ടര്‍ എടക്കാട് പോലീസ്‌സ്റ്റേഷനില്‍ വിളിച്ചു ചേര്‍ത്ത സര്‍വ്വകക്ഷിയോഗം ആഹ്വാനം ചെയ്തു. മുഴപ്പിലങ്ങാട്, കടമ്പൂര്‍ ഗ്രാമപഞ്ചായത്ത് പ്രസിഡണ്ടുമാരും വിവിധ രാഷ്‌ട്രീയ പാര്‍ട്ടി പ്രതിനിധികളും ക്ഷേത്രകമ്മറ്റി ഭാരവാഹികളും യോഗത്തില്‍ പങ്കെടുത്തു. ഉത്സവത്തിന്റെ പ്രധാന ദിനമായ ഇന്ന് ഉച്ചക്ക് 2 മണിമുതല്‍ കളത്തില്‍ പണംവെക്കല്‍, വൈകുന്നേരം 4 മുതല്‍ രാത്രി 12 വരെ കലശം വരവ്, വൈകുന്നേരം 5ന് കളംപാട്ട്, 12 മുതല്‍ 2വരെ ശ്രീരാമവിലാസം കാഴ്ചക്കമ്മറ്റി, നടാല്‍ എടക്കാട് കാഴ്ചകമ്മറ്റി എന്നിവയുടെ ആഭിമുഖ്യത്തിലുള്ള കാഴ്ചവരവ്, പുലര്‍ച്ചെ 3 മുതല്‍ മൊതക്കലശം എതിരേല്‍ക്കല്‍, 4ന് ഡിജിറ്റല്‍ കരിമരുന്ന് പ്രയോഗം, 5ന് ശ്രീ കുറുമ്പ ഭഗവതിയുടെ കുളിച്ചെഴുന്നളത്ത്, 5.30ന് കലശം കയ്യേല്‍ക്കലും കളം കയ്യേല്‍ക്കലും, രാവിലെ 7ന് ഉദയാസ്തമന പൂജ, രാവിലെ 11ന് കാവില്‍നിന്നുമിറങ്ങല്‍ എന്നിവയാണ് പ്രധാന ചടങ്ങുകള്‍.