പൊന്കുന്നം: 137-ാം പിറന്നാള് ആഘോഷിക്കുന്ന സര്ക്കാര് വിദ്യാലയത്തിന് കുരുന്നുകളുടെ അക്ഷരാദരം. ചിറക്കടവ് ഗവ. എല്പി സ്കൂളിലെ കുട്ടികളാണ് പിറന്നാള് ആഘോഷങ്ങളുടെ ഭാഗമായി അക്ഷരമുത്തശി എന്ന പേരില് പത്രം പ്രസിദ്ധീകരിച്ചത്.
ആത്മാഭിമാനത്തിലും ധൈര്യത്തിലും വളരുവാന് വേദിയൊരുക്കുക എന്നതാണ് വിദ്യാഭ്യാസത്തിന്റെ മുഖ്യലക്ഷ്യം എന്ന ഗാന്ധിവചനമാണ് പത്രത്തിന്റെ ടാഗ് ലൈന്. വിവിധ വിഷയങ്ങളെക്കുറിച്ച് സ്കൂളിലെ ആകെയുള്ള കുട്ടികള് തയറാക്കിയ രചനകളാണ് നാലു പേജുള്ള പത്രത്തില് ഉള്പ്പെടുത്തിയിരിക്കുന്നത്.
പൊന്കുന്നം ഹില്ഡാ ഓഡിറ്റോറിയത്തില് നടന്ന പുസ്തകപ്രകാശന ചടങ്ങില് സ്കൂള് ലീഡര് അഖില ശശി, വിദ്യാര്ഥികളായ മഹാലക്ഷ്മി, വൈശാഖ്, ദേവദത്ത് എന്നിവര് ചേര്ന്ന് പത്രത്തിന്റെ കോപ്പി ഉപജില്ലാ വിദ്യാഭ്യാസ ഓഫീസര് സി.എന്. തങ്കച്ചനു നല്കി പ്രകാശനം നല്കി. സ്കൂള് വാര്ഷികാഘോഷം ബുധനാഴ്ച സ്കൂള് ഓഡിറ്റോറിയത്തില് നടക്കും. രാവിലെ 10ന് നടക്കുന്ന ചടങ്ങില് ചിറക്കടവ് പഞ്ചായത്ത് പ്രസിഡന്റ് ജയാ ശ്രീധര് ഉദ്ഘാടനം ചെയ്തു. പിറ്റിഎ പ്രസിഡന്റ് വി.ജി. ജയദേവന് അധ്യക്ഷത വഹിക്കും. ഉപജില്ലാ വിദ്യാഭ്യാസ ഓഫീസര് സി.എന്. തങ്കച്ചന് മുഖ്യപ്രഭാഷണം നടത്തും. ചിറക്കടവ് പഞ്ചായത്ത് സ്റ്റാന്ഡിംഗ് കമ്മിറ്റി ചെയര്പേഴ്സണ് ബിന്ദു സന്തോഷ് എന്ഡോവ്മെന്റ് വിതരണവും പഞ്ചായത്തംഗം സുബിതാ ബിനോയി എവര്റോളിംഗ് ട്രോഫി വിതരണവും നിര്വഹിക്കും. പഞ്ചായത്തംഗം കെ.ജി. കണ്ണന് പുലരി കൈയെഴുത്ത് മാസിക പ്രകാശനം ചെയ്യും. പഞ്ചായത്തംഗം ബി. രവീന്ദ്രന് നായര് ചടങ്ങില് പങ്കെടുക്കുന്ന വിവിധ മേഖലകളില് കഴിവു തെളിയിച്ചവരെ ആദരിക്കും. തുടര്ന്നു കുട്ടികളുടെ കലാപരിപാടികളും നടക്കും.
പത്രസമ്മേളനത്തില് സ്കൂള് ഹെഡ്മിസ്ട്രസ് വി.വി. അംബിക, അധ്യാപിക പി.ജി. ഷീലാകുമാരി തുടങ്ങിയവര് പങ്കെടുത്തു.
