തലശ്ശേരി: തലശ്ശേരി റെയില്വെ സ്റ്റേഷനില് എത്തുന്ന യാത്രക്കാര്ക്ക് കൂടുതല് സൗകര്യങ്ങള് ഏര്പ്പെടുത്താന് സജീവമായി ഇടപെട്ടിട്ടുണ്ടെന്നും ഇക്കാര്യത്തില് അനുകൂലമായ നിലപാടാണ് കേന്ദ്ര റെയില്വെ മന്ത്രി സുരേഷ് പ്രഭുവും ഉന്നത ഉദ്യോഗസ്ഥരും സ്വീകരിച്ചിട്ടുള്ളതെന്നും പ്രൊഫ. റിച്ചാര്ഡ്ഹെ എംപി മാധ്യമപ്രവര്ത്തകരെ അറിയിച്ചു. റിട്ടയറിംഗ് റൂം, ഫുഡ് പ്ലാസ എന്നിവ എത്രയും പെട്ടെന്ന് ആരംഭിക്കാമെന്ന് കഴിഞ്ഞ ദിവസം തലശ്ശേരി റെയില്വെ സ്റ്റേഷന് സന്ദര്ശിച്ച ജനറല്മാനേജര് സമ്മതിച്ചിട്ടുണ്ട്. യാത്രക്കാര്ക്ക് കൂടുതല് സുരക്ഷിതത്വം ഉണ്ടാക്കാന് ആര്.പി.എഫിന്റെ അംഗസംഖ്യ കൂട്ടാനും ഇതിനായി വനിത ഉദ്യോഗസ്ഥരെ ഉള്പ്പെടെ തലശ്ശേരിയില് നിയമിക്കാനും ധാരണയായിട്ടുണ്ട്. കുടിവെള്ള ക്ഷാമം പരിഹരിക്കാന് പ്രത്യേകം കിണറും ടാങ്കും പൈപ്പ് ലൈനും അടിയന്തിരമായി സ്ഥാപിക്കും. പ്ലാറ്റ് ഫോമിന്റെ മേല്ക്കൂര തീവണ്ടികളിലെ മുഴുവന് കമ്പാര്ട്ട്മെന്റുകള്ക്കും പ്രയോജനപ്പെടുത്തുന്ന തരത്തില് പൂര്ണ്ണമാക്കും. ബസ് സ്റ്റാന്ഡില് നിന്നും റെയില്വെ സ്റ്റേഷനിലേക്ക് എളുപ്പത്തില് പ്രവേശിക്കാനുള്ള നടപ്പാത നിര്മ്മിക്കാന് റെയില്വെ അനുവാദം നല്കിയിട്ടുണ്ട്. ഇത് യാഥാര്ത്ഥ്യമാക്കാന് നഗരസഭയും റെയില്വെയും ധാരണാപത്രത്തില് ഒപ്പുവെക്കണം. നിലവിലുള്ള ഓവുചാല് സ്ലാബിട്ട് മൂടി നടപ്പാത പണിതാല് നഗരത്തിലെ പ്രധാന കൊതുകുവളര്ത്തല് കേന്ദ്രം ഇല്ലാതാവും. റയില്വെ സ്റ്റേഷനിലെത്തുന്ന യാത്രക്കാര്ക്ക് കൊതുകടിയേല്ക്കാതെ തീവണ്ടികള്ക്ക് കാത്തിരിക്കാനാവുമെന്നും എംപി പറഞ്ഞു. തലശ്ശേരിയെ മാതൃകാ സ്റ്റേഷനായി പരിഗണിച്ചുള്ള സൗകര്യങ്ങള് അടിയന്തിരമായി ഏര്പ്പെടുത്തുമെന്നും അദ്ദേഹം കൂട്ടിച്ചേര്ത്തു.
തലശ്ശേരി റെയില്വെ സ്റ്റേഷന് വികസനം: കേന്ദ്രത്തിന്റേത് അനുകൂല നിലപാട്: റിച്ചാര്ഡ്ഹെ എം. പി.
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.