ഇരിട്ടി: വള്ളിത്തോടില് പിക്കപ്പ് വാനില് കയറ്റിപ്പോവുകയായിരുന്ന വൈക്കോലിന് വൈദ്യുത ലൈനില്ത്തട്ടി തീപ്പിടിച്ചു. നാട്ടുകാരുടെ സമയോചിതമായ ഇടപെടല് മൂലം വന് ദുരന്തം ഒഴിവായി. തിങ്കളാഴ്ച ഉച്ചക്ക് 1.30 തോടെ ആയിരുന്നു അപകടം. കര്ണ്ണാടകത്തില് നിന്നും പെരിങ്കരിയിലേക്ക് വൈക്കോല് കയറ്റി വരികയായിരുന്ന വള്ളിത്തോട് സ്വദേശിയുടെ ബൊലേറോ പിക്കപ്പ് വാഹനമാണ് വള്ളിത്തോട് ഉളിക്കല് മലയോര ഹൈവേയില് വള്ളിത്തോട് ടൗണിന് സമീപം അപകടത്തില്പ്പെട്ടത്. റോഡിനു കുറുകേ വലിച്ച വൈദ്യുത ലൈനില്ത്തട്ടി വൈക്കോലിന് തീപ്പിടിക്കുകയായിരുന്നു. തീ പടരുന്നത് കണ്ട നാട്ടുകാര് ഉടനെ വാഹനം പിന്നോട്ടെടുപ്പിച്ചു. ആളും കെട്ടിടങ്ങളും ഒഴിഞ്ഞ സ്ഥലത്തേക്ക് മാറ്റി റോഡു പണിക്കായി സ്ഥലത്ത് ഉണ്ടായിരുന്ന ജെസിബി കൊണ്ട് വൈക്കോല് മുഴുവന് റോഡരികിലേക്ക് തട്ടിയിട്ട് വാഹനം അവിടെ നിന്നും മാറ്റി. നട്ടുച്ചയിലെ ചൂടില് ആളിക്കത്തുകയായിരുന്ന വൈക്കോല് ഇരിട്ടിയില് നിന്നും സ്റ്റേഷന് ഓഫീസര് ജോണ്സണ് പീറ്ററുടെ നേതൃത്വത്തിലുള്ള അഗ്നിശമന സേനാ സംഘം അണക്കുകയായിരുന്നു. അതേസമയം വൈദ്യുതി വകുപ്പ് ഉദ്യോഗസ്ഥരുടെ അനാസ്ഥയാണ് വൈക്കോലിന് തീപ്പിടിക്കാന് ഇടയായതെന്ന് നാട്ടുകാര് ആരോപിച്ചു. വൈക്കോലിന് തീപ്പിടിച്ച സ്ഥലത്തിനു ഏതാനും വാര അകലത്തിലാണ് വള്ളിത്തോട് സെക്ഷന് ഓഫീസ് പ്രവര്ത്തിക്കുന്നത്. ഉളിക്കല് വള്ളിത്തോട് മലയോര ഹൈവേയുടെ നിര്മ്മാണത്തിന്റെ ഭാഗമായി പല ഭാഗങ്ങളിലും റോഡ് ഉയര്ത്തിയത് മൂലം വൈദ്യുത ലൈനുകള് അപകടകരമാം വിധം താണ് കിടക്കുകയാണ്. ഒരു ബസ്സ് കടന്നു പോകുവാന് മാത്രം താഴ്ചയിലാണ് ഏറെ ഇടങ്ങളിലും ലൈന് നിലവിലുള്ളത്. ഇതുവഴി നിരവധി ബസ്സുകളും ഭാരം കയറ്റിയ ലോറികളും നിത്യവും കടന്നു പോവുന്നുണ്ട്. ലൈന് മാറ്റി സ്ഥാപിക്കാനുള്ള പണം ബന്ധപ്പെട്ടവര് വൈദ്യുതി വകുപ്പില് അടച്ച് എട്ട് മാസം പിന്നിട്ടു കഴിഞ്ഞതായി നാട്ടുകാര് ആരോപിക്കുന്നു. നിരവധി തവണ ഇതുമായി ഓഫീസിനെ സമീപിച്ചെങ്കിലും ലൈന് മാറ്റി സ്ഥാപിക്കാന് അധികൃതര് തായാറാവുന്നില്ല എന്നാണ് നാട്ടുകാര് ആരോപിക്കുന്നത്.
