കാട്ടാക്കട: സര്ക്കാരിന്റെ സമ്പൂര്ണ്ണ വൈദ്യുതീകരണത്തിന് അര്ഹരായിട്ടും വീട് വയറിംഗ് ചെയ്യാത്തതിനാല് വൈദ്യുതി നിഷേധിക്കപ്പെട്ട, ഇരുള്മൂടിയ വീടുകള്ക്ക് വെളിച്ചവുമായി ഭാവന. പൂഴനാട് നീരാഴികോണം കേന്ദ്രമാക്കി പ്രവര്ത്തിക്കുന്ന ഭാവന ഗ്രന്ഥശാല ആന്റ് കലാസാംസ്കാരിക കേന്ദ്രമാണ് സേവന വഴിയില് പുതിയ ദൗത്യവുമായി ജനങ്ങള്ക്കിടയിലേക്ക് ഇറങ്ങിചെന്നത്.
‘സാമൂഹ്യ വികസനം പോളിടെക്നിക്കിലൂടെ’ എന്ന കേന്ദ്ര മാനവ വിഭവശേഷി മന്ത്രാലയത്തിന്റെ പദ്ധതി പ്രകാരം ഭാവന ഗ്രന്ഥശാലയില് പ്രവര്ത്തിക്കുന്ന നെയ്യാറ്റിന്കര പോളിടെക്നിക്ക് കോളേജിന്റെ സബ് സെന്ററിലെ വിദ്യാര്ത്ഥികളും അദ്ധ്യാപകരുമാണ് 50 വീടുകള് സൗജന്യമായ് വയറിംഗ് ചെയ്ത് നല്കി നാടിനാകെ മാതൃകയായത്.
വയറിംഗ് ജോലികള് ചെയ്യാന് കഴിവില്ലാത്ത അന്പതോളം കുടുംബങ്ങളുടെ നിസഹായാവസ്ഥകാരണം ഒറ്റശേഖരമംഗലം ഗ്രാമപഞ്ചായത്തില് സമ്പൂര്ണ്ണ വൈദ്യുതീകരണ യജ്ഞം പൂര്ത്തിയാക്കാന് സാധിച്ചില്ല. രാജ്യം മികച്ച സന്നദ്ധ സംഘടനയ്ക്കുള്ള പുരസ്കാരം നല്കി ആദരിച്ച ഭാവന ഒടുവില് പഞ്ചായത്തിലെ അന്പത് കുടുംബങ്ങളെയും ഏറ്റെടുക്കുകയായിരുന്നു. നെയ്യാറ്റികര പോളിടെക്നിക്കും ഭാവനയ്ക്ക് കരുത്തായി ഈ പ്രവര്ത്തനങ്ങളില് പങ്കാളികളായി. ഭാവന കലാസാംസ്കാരിക കേന്ദ്രത്തിന്റെ 100 ദിവസം നീണ്ടുനില്ക്കുന്ന രജത ജൂബിലി ആഘോഷങ്ങളുടെ ഭാഗമായാണ് സൗജന്യ വീട് വയറിംഗ് പദ്ധതി ഏറ്റെടുത്തത്. ഗ്രാമ പഞ്ചായത്ത് പ്രസിഡന്റിന്റെ നേതൃത്വത്തില് ജനപ്രതിനിധികളും വൈദ്യുതി ബോര്ഡ് ജീവനക്കാരും പരിപൂര്ണ്ണ പിന്തുണ നല്കി. ഭാവനയില് പ്രവര്ത്തിക്കുന്ന പോളിടെക്നിക്ക് സബ്സെന്ററിലെ അദ്ധ്യാപകരായ ജസ്റ്റിന്, ബിനു, മധു, ഭാവന ഭാരവാഹികളായ രാജേഷ് പ്രദീപം, ബിനു, സജിന്, സതികുമാര്, രാജേഷ് കൃഷ്ണന്, പൂഴനാട് ഗോപന് എന്നിവരാണ് ഇതിന് നേതൃത്വം നല്കുന്നത്.
ഭാവന സബ് സെന്ററില് നിന്ന് കഴിഞ്ഞ വര്ഷം പഠനം പൂര്ത്തിയാക്കി വയറിംഗ് ലൈസന്സ് നേടിയവരും ഭാവനയുടെ വലിയ പ്രവര്ത്തനത്തെ സഹായിക്കാന് എത്തിയതോടെ സേവന വഴിയില് കാരുണ്യത്തിന്റെ പുതുവെളിച്ചം തെളിഞ്ഞു. ഇനി അമ്പൂരി പഞ്ചായത്തിലെ തൊടുമല വാര്ഡിലെ അന്പത് വീടുകള് വയറിംഗ് ചെയ്ത് നല്കാനുള്ള തയ്യാറെടുപ്പിലാണ് ഇവര്.
പ്രതികരിക്കാൻ ഇവിടെ എഴുതുക: