കട്ടപ്പന: മോഹന്ലാലും രജനികാന്തും യു.കെ ഗോപാലന് എന്ന തെരുവ് സര്ക്കസുകാരനെ ഇപ്പോള് ഓര്ക്കുന്നുണ്ടാവുമോ…. മോഹന്ലാല് അഭിനയിച്ച വിഷ്ണുലോകം എന്ന ചലച്ചിത്രത്തിലും രജനികാന്ത് അഭിനയിച്ച വേലക്കാരന് എന്ന സിനിമിയിലും ഗ്ലാമര് താരങ്ങളുടെ ഡ്യൂപ്പായി അഭിനയിച്ചത് ആലുവ ചൂണ്ടി ഉള്ളാത്തുവളപ്പില് ഗോപാലന് എന്ന യു.കെ ഗോപാലനായിരുന്നു. പത്തോളം സിനിമകളില് പ്രമുഖതാരങ്ങള്ക്ക് വേണ്ടി ഡ്യൂപ്പായി അഭിനയിച്ചു.
ജീവന് പണയപ്പെടുത്തി മിന്നുന്ന പ്രകടനം നടത്തിയപ്പോഴും ഗോപാലന്റെ മുഖം ഒരു സിനിമയിലും കണ്ടെടുക്കാനാവില്ല. തുച്ഛമായ വേതനം ലഭിച്ച് അഭ്യാസ പ്രകടനം നടത്തിയെങ്കിലും വെള്ളിത്തരയില് മിന്നാന് കഴിഞ്ഞില്ല. കാലം കടന്നുപോയപ്പോള് സാങ്കേതിക സംവിധാനം വളര്ന്നു. സാഹസിക പ്രകടനത്തിന് സാങ്കേതിക സഹായം ലഭിച്ച് തുടങ്ങിയതോടെ ഗോപാലനെപ്പോലുള്ളവരുടെ കഴിവ് ചോദ്യചിഹ്നമായി. ഇനി സിനിമയില് നിന്നാല് ജീവിതം മുന്നോട്ടുപോകില്ലെന്ന് വ്യക്തായതിനാല് വന്ന വഴിയേ തന്നെ തിരിച്ച് നടന്നു. തെരുവ് സര്ക്കസുമായി ഗോപാലന് മുന്നോട്ടുപോയി. രാജ്യത്തിന്റെ വിവിധ ഭാഗങ്ങളില് ചുറ്റിനടന്ന് റോഡ് ഷോ നടത്തി.
ഹീറോ ഹോണ്ട ബൈക്കിലാണ് സഞ്ചാരം. ഒപ്പം തന്റെ പ്രിയതമ മൈലമ്മയും ഉണ്ടാവും. ആന്ധ്രാ ,കര്ണാടക, കേരള, ആന്ഡമാന്, നിക്കോബാന്, കാശി, വാരാണസി തുടങ്ങിയ നിരവധി സ്ഥലങ്ങളില് സഞ്ചരിച്ച് ഇദ്ദേഹം അഭ്യാസപ്രകടനങ്ങള് നടത്തി. ഈ യാത്രയിലാണ് കഴിഞ്ഞ ദിവസം ഇടുക്കിയില് എത്തിയത്. കൊന്നത്തടി, വാത്തിക്കുടി എന്നീ പഞ്ചായത്തുകളിലാണ് അഭ്യാസ പ്രടനം നടത്തിയത്.
എവിടെച്ചെന്നാലും നാട്ടുകാരുടെ ഭാഗത്തുനിന്നും നല്ല സപ്പോര്ട്ടാണ് ലഭിക്കുന്നത്. മനസ് വിചാരിക്കുന്നിടത്ത് ശരീരം എത്താന് പ്രയാസപ്പെടുമ്പോഴും ഈ അറുപത്തിനാല്കാരന് പതറിയില്ല. പതിനാലാം വയസില് സര്ക്കലെത്തിയപ്പോഴുണ്ടായിരുന്നതിലും കരളുറപ്പ് ഇന്നുണ്ടെന്ന് ഗോപാലന് പറയുന്നു.
