പാനൂര്: കല്ലിക്കണ്ടിയില് അനധികൃത മത്സ്യ മാര്ക്കറ്റ്.നടപടിയുമായി ആരോഗ്യ വകുപ്പും പഞ്ചായത്തും. ഹരിത തൃപ്പങ്ങോട്ടൂര് പ്രഖ്യാപനം കഴിഞ്ഞ ദിവസം കലക്ടര് ഉദ്ഘാടനം ചെയ്ത് ഏറെ പ്രശംസ പിടിച്ചുപറ്റിയ പഞ്ചായത്തില് തന്നെയാണ് അനധികൃത മാര്ക്കറ്റ് പ്രവര്ത്തിക്കുന്നത്.ലൈസന്സിലാതെ മത്സ്യം, ബേക്കറി പലഹാരങ്ങളും പച്ചക്കറികളും ചോമ്പാല് ഫിഷ് മാര്ക്കറ്റില് ലഭ്യമാണ്. ഇതിനു ലൈസന്സില്ല എന്ന് പഞ്ചായത്ത് പ്രസിഡണ്ട് കാട്ടൂര് മുഹമ്മദ് പറഞ്ഞു. ഇന്നലെ ആരോഗ്യ വകുപ്പ് അധികൃതര് നടത്തിയ പരിശോധനയില് ചീഞ്ഞളിഞ്ഞ മത്സ്യം കണ്ടെത്തി.മാര്ക്കറ്റ് പൂട്ടാന് ആവശ്യപ്പെട്ടെങ്കിലും ഉടമ കൂട്ടാക്കിയില്ല. നടപടിക്കായി പോലീസ് സഹായം തേടിയതിനെ തുടര്ന്ന് പാനൂര് സിഐ കെഎസ്.ഷാജിയും സംഘവും സ്ഥലത്തെത്തി. തുടര്ന്ന് സിപിഎം പ്രവര്ത്തകരും സിഐടിയു തൊഴിലാളികളും ഉടമയ്ക്കു അനുകൂലമായി നിലനിന്നതോടെ ഏറെനേരം സംഘര്ഷാവസ്ഥയായി. പോലീസ് നില ശാന്തമാക്കി. പഞ്ചായത്ത് ഓഫീസിനു സമീപം തന്നെയാണ് ഫിഷ് മാര്ക്കറ്റ് പ്രവര്ത്തിക്കുന്നത്. മാര്ക്കറ്റ് ഉടമ സിപിഎം പ്രവര്ത്തകനായതിനാല് പാര്ട്ടി നേതൃത്വം മാര്ക്കറ്റിനു അനുകൂലമായി നിലകൊളളുകയാണെന്ന് നാട്ടുകാര് ആരോപിക്കുന്നു. ഹരിത പഞ്ചായത്ത് പ്രഖ്യാപിച്ചതിനു ശേഷവും പ്ലാസ്റ്റിക്ക് ക്യാരി ബാഗുകള് ഇവിടെ നിന്നും നല്കുന്നതായും പരാതിയുണ്ട്.ഇതു കലക്ടറുടെ ശ്രദ്ധയില്പ്പെടുത്തിയതായി പഞ്ചായത്ത് അധികൃതര് അറിയിച്ചു. സര്ക്കാറിന്റെ ഹരിതകേരളം പദ്ധതി അട്ടിമറിക്കാന് കല്ലിക്കണ്ടിയില് സിപിഎം പ്രവര്ത്തകര് തന്നെ കൂട്ടുനില്ക്കുന്ന വിരോധാഭാസമാണ് കാണുന്നത്. മത്സ്യമാര്ക്കറ്റ് പൂട്ടിക്കാനായി നിയമനടപടി ശക്തമാക്കാന് തന്നെയാണ് പഞ്ചായത്തും ആരോഗ്യ വകുപ്പും ഒരുങ്ങുന്നത്.
കല്ലിക്കണ്ടിയിലെ അനധികൃത മത്സ്യ മാര്ക്കറ്റിനെതിരെ ആരോഗ്യവകുപ്പ്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.