ന്യൂദല്ഹി: മധ്യവര്ഗത്തിന് ആശ്വാസമായി ആദായനികുതിയില് ഇളവ്. രണ്ടര ലക്ഷം വരെ നികുതിയില്ല. രണ്ടരക്ഷം മുതല് അഞ്ചുലക്ഷം വരെ വരുമാനമുള്ളവര്ക്ക് ആദായനികുതി പത്തില് നിന്ന് അഞ്ചുശതമാനമായി വെട്ടിക്കുറച്ചു. അധികവരുമാനക്കാരില് നിന്ന് സര്ച്ചാര്ജ് ഈടാക്കാനും ബജറ്റില് നിര്ദേശമുണ്ട്.
മൂന്ന് ലക്ഷം മുതല് മൂന്നരലക്ഷം വരെ വരുമാനമുളളവര്ക്ക് 2500 രൂപ മാത്രമാണ് നികുതി നല്കേണ്ടിവരുക. 80 സി പ്രകാരം 1.5 ലക്ഷം നിക്ഷേപം നടത്തുന്നവര്ക്ക് നാലര ലക്ഷം വരെ നികുതി നല്കണ്ട. നികുതി കുറച്ചതോടെ 50 ലക്ഷം വരെ വരുമാനമുളളവര്ക്ക് അടുത്ത വര്ഷം 12500 രൂപ വരെ മെച്ചമുണ്ടാകും. അഞ്ചു മുതല് പത്തുലക്ഷം വരെ വരുമാനമുള്ളവര് 20 ശതമാനവും പത്ത് ലക്ഷത്തില് കൂടുതലുളളവര് 30 ശതമാനവും നികുതി നല്കണം.
അമ്പതു ലക്ഷം മുതല് ഒരു കോടി വരെ വരുമാനമുളളവര് പത്തുശതമാനവും ഒരു കോടിയില് കൂടുതല് വരുമാനമുളളവര് 15 ശതമാനവും സര്ചാര്ജ് നല്കണം.
ഇന്ത്യയുടെ നികുതി ആഭ്യന്തര വളര്ച്ചാ നിരക്കിന് അനുകൂലമല്ലെന്നാണ് കണക്കുകള് സൂചിപ്പിക്കുന്നത്. രാജ്യത്ത് സംഘടിത മേഖലയില് ജോലിചെയ്യുന്ന 4.2 കോടി ജീവനക്കാരുണ്ടെങ്കിലും 1.75 കോടി പേര് മാത്രമാണ് ആദായ നികുതി റിട്ടേണ് ഫയല് ചെയ്തതെന്ന് മന്ത്രി ബജറ്റില് വ്യക്തമാക്കി.
രജിസ്റ്റര് ചെയ്തിട്ടുളള 13.14 ലക്ഷം കമ്പനികളില് 5.97 ലക്ഷം കമ്പനികള് മാത്രമാണ് റിട്ടേണുകള് നല്കിയത്. റിട്ടേണ് ഫയല് ചെയ്ത 1.95 കോടിയാളുകള്ക്ക് രണ്ടര ലക്ഷം മുതല് അഞ്ചു ലക്ഷം വരെ വരുമാനമുണ്ട്. 76 ലക്ഷം പേര്ക്ക് അഞ്ചു ലക്ഷത്തില് കൂടുതല് വരുമാനമുണ്ട്. ഇതില് 56 ലക്ഷം പേര് ശമ്പളം പറ്റുന്നവരാണ്.1.72 ലക്ഷം പേര്ക്ക് 50 ലക്ഷത്തിനുമുകളില് വരുമാനമുണ്ട്. ഇങ്ങനെയാണെങ്കിലും നികുതി അടക്കുന്നവര് വളരെക്കുറവാണ്.
എന്നാല് കഴിഞ്ഞ അഞ്ചു വര്ഷത്തിനിടെ കാര് വാങ്ങിയവര് 1.25 കോടിയാണ്. ബിസിനസിനും വിനോദ സഞ്ചാരത്തിനും വിദേശത്തേക്ക് പറന്നത് 2 കോടി പേരും.
നോട്ട് അസാധുവാക്കിയശേഷം നവംബര് 8നും ഡിസംബര് 30നും ഇടയില് രണ്ടു ലക്ഷം മുതല് 80 ലക്ഷം വരെ 1.09 കോടി അക്കൗണ്ടുകളില് നിക്ഷേപിച്ചിട്ടുണ്ട്. 2013-14 ല് 11.38 ലക്ഷം കോടി നികുതി വരുമാനമായി ലഭിച്ചു.
