മേപ്പാടി : മുട്ടില്-മേപ്പാടി റോഡിലെ മാണ്ടാട് മുതല് നെടുമ്പാല വരെയുള്ള ഭാഗം ഗതാഗതയോഗ്യമാക്കണമെന്ന് ഭാരതീയ ജനതാ പാര്ട്ടി മേപ്പാടി പഞ്ചായത്ത് കമ്മിറ്റി ആവശ്യപ്പെട്ടു.
മാണ്ടാട് മുതല് നെടുമ്പാല വരെയുള്ള ഭാഗം പൂര്ണ്ണമായും തകര്ന്നനിലയിലാണ്. റോഡിന്റെ മോശാവസ്ഥ മൂലം ഇവിടം നിരന്തരം അപകടങ്ങള് സംഭവിക്കുന്നു. സ്വകാര്യ ബസ്സ് സര്വ്വീസുകള് മുടങ്ങുന്നതും പതിവാണ്. പഞ്ചായത്ത് ഓഫീസ്, സ്കൂള്, കൃഷിഭവന്, സര്ക്കാര് ആശുപത്രി, പോലീസ്സ്റ്റേഷന് എന്നിവിടങ്ങളിലെത്തുന്നവര്ക്കും വിദ്യാര്ത്ഥികള്ക്കും വളരെയധികം പ്രശ്നങ്ങളാണ് റോഡ് ഗതാഗതയോഗ്യമല്ലാത്തിനാല് സംഭവിക്കുന്നത്. വര്ഷങ്ങളായി തകര്ന്നുകിടക്കുന്ന റോഡ് നന്നാക്കാന് യാതൊരു നടപടിയും അധികൃതര് സ്വീകരിച്ചിട്ടില്ല.
റോഡ് ഗതാഗതയോഗ്യമാക്കാന് നടപടി സ്വീകരിച്ചില്ലെങ്കില് പിഡബ്ല്യുഡി ഓഫീസ് ഉപരോധമടുക്കമുള്ള ശക്തമായ സമരപരിപാടികളുമായി മുന്നോട്ടുപോകുമെന്ന് ബിജെപി മേപ്പാടി പഞ്ചായത്ത് കമ്മിറ്റി അറിയിച്ചു.
നിയോജക മണ്ഡലം പ്രസിഡന്റ് ആരോട രാമചന്ദ്രന്, സുബീഷ്, ശ്രീധരന്, രാധാകൃഷ്ണന് ചേലേരി, ബിനീഷ്, ശിവാനന്ദന്, ഷാജിമോന്, ബിജു ഗൂഡലായ് എന്നിവര് സംസാരിച്ചു.
