തിരൂര്: ദിവസങ്ങളായി സിപിഎം അക്രമം അഴിച്ചുവിട്ടിരിക്കുന്ന പടിഞ്ഞാറേക്കരയില് ഇന്നലെ എബിവിപി ജില്ലാ കണ്വീനറെ അക്രമിസംഘം ക്രൂരമായി മര്ദ്ദിച്ചു. പടിഞ്ഞേറക്കര അമ്പലപ്പടി തെക്കന്വീട്ടില് വിഭീഷണന്റെ മകന് വിഷ്ണു(21) ആണ് സിപിഎമ്മിന്റെ ഇന്നലത്തെ ഇര. താനൂര് ഗവ.ആര്ട്സ് ആന്ഡ് സയന്സ് കോളേജില് ബിസിഎ മൂന്നാംവര്ഷ വിദ്യാര്ത്ഥിയായ വിഷ്ണു വീട്ടിലേക്ക് പോകുമ്പോഴായിരുന്നു ആക്രമണം. കുറ്റിക്കാടുകള്ക്കിടയില് ആയുധങ്ങളുമായി ഒളിച്ചിരുന്ന അക്രമികള് വിഷ്ണുവിനെ അടിച്ചുവീഴ്ത്തുകയായിരുന്നു. നാല് ദിവസത്തിനിടെ മൂന്നുപേര്ക്കാണ് സിപിഎം ആക്രമണത്തില് പരിക്കേറ്റത്. കഴിഞ്ഞ ദിവസം ഷിജീഷിനെ ആക്രമിച്ച അതേ സ്ഥലത്ത് വെച്ചുതന്നെയാണ് വിഷ്ണുവിനും മര്ദ്ദനമേറ്റത്. മരകഷ്ണം, ഇരുവടി, സൈക്കിള് ചെയിന് തുടങ്ങിയവ ഉപയോഗിച്ചായിരുന്നു മര്ദ്ദനം. സംഭവത്തെ തുടര്ന്ന് നാട്ടുകാര് പോലീസില് വിവരം അറിയിക്കുകയും പോലീസെത്തി ഗുരുതരമായി പരിക്കേറ്റ വിഷ്ണുവിനെ തിരൂര് ജില്ലാ ആശുപത്രിയിലെത്തിക്കുകയായിരുന്നു.
ജനങ്ങളെ പുറത്തിറങ്ങാന് അനുവദിക്കാതെ പടിഞ്ഞാറേക്കരയില് സിപിഎമ്മിന്റെ നരനായാട്ട് തുടരുകയാണ്. നടന്നുപോകുന്നവരെ തടഞ്ഞുനിര്ത്തി മര്ദ്ദിക്കുകയാണ്. കുട്ടികള്ക്ക് സ്കൂളില് പോലും പോകാനാകുന്നില്ല.
