കണ്ണൂര്: ജില്ലയിലെ 11 നിയമസഭാ മണ്ഡലങ്ങളിലെയും പട്ടികജാതി കോളനികളില് വൈദ്യുതി എത്തിക്കാന് ജില്ലാ പഞ്ചായത്ത് ഒരു കോടി രൂപ വകയിരുത്തി. സമ്പൂര്ണ്ണ വൈദ്യുതീകരണ ജില്ലയായി കണ്ണൂരിനെ മാറ്റുന്നതിന്റെ ഭാഗമായാണ് ഈ തുക വകയിരുത്തിയത്. കോളനികളിലെ മുഴുവന് വീടുകള് വൈദ്യുതീകരിക്കുന്നതിനാവശ്യമായ രീതിയില് ലൈന് വലിക്കുന്നതടക്കമുളള കാര്യങ്ങള്ക്കാണ് ജില്ലാ പഞ്ചായത്ത് ഫണ്ട് വിനിയോഗിക്കുക. ജില്ലാ പഞ്ചായത്ത് പ്രസിഡന്റ് കെ.വി.സുമേഷിന്റെ അധ്യക്ഷതയില് ജില്ലാപഞ്ചായത്ത് ഹാളില് ചേര്ന്ന ജില്ലാ പഞ്ചായത്ത് യോഗത്തിലാണ് തീരുമാനം.
കണ്ണൂര് ജില്ല സമ്പൂര്ണ വൈദ്യുതീകരണം നടപ്പാക്കുന്നതിന്റെ ഭാഗമായാണ് പദ്ധതി ആസൂത്രണം ചെയ്തിരിക്കുന്നത്. പട്ടികജാതി ബിപിഎല് കുടുംബങ്ങളുടെ വീടുകള് വൈദ്യുതീകരിക്കല് എന്ന പേരീല് രൂപീകരിച്ച് പദ്ധതി നടപ്പാക്കും. പദ്ധതിക്ക് ആവശ്യമായ വൈദ്യുതി ലൈന് വലിക്കുന്നതിനായി 97,55,592 രൂപയുടെ എസ്റ്റിമേറ്റ് തയ്യാറായതായി ഡപ്യൂട്ടി ചീഫ് എഞ്ചിനീയര് അറിയിച്ചതിനെ തുടര്ന്നാണ് ജില്ലാപഞ്ചായത്ത് തുക വകയിരുത്തിയത്. ജില്ലാ പട്ടികജാതി ഓഫീസര്ക്കാണ് പദ്ധതിയുടെ നടത്തിപ്പ് ചുമതല. പദ്ധതിക്ക് നീക്കിവച്ചതിന് ശേഷമുള്ള ബാക്കി തുകയില് നിന്ന് 1,50,000 രൂപ കാഞ്ഞിരപ്പൊയില് പട്ടികജാതി കോളനിയില് കുടിവെള്ള പദ്ധതിക്കും 28,07,408 രൂപ സര്ക്കാര് ഉത്തരവിന് വിധേയമായി ഐ.എ.വൈ പദ്ധതിക്ക് വകയിരുത്താനും തീരുമാനമെടുത്തിട്ടുണ്ട്.
ഫര്ണിച്ചര് ദൗര്ലഭ്യമുളള സ്കൂളുകള്ക്ക് ഫര്ണിച്ചര് നല്കാന് 2 കോടി രൂപയും നീക്കിവെച്ചു. ഈ വര്ഷം മാര്ച്ചിനകം സ്കൂളുകള്ക്കാവശ്യമായ ഫര്ണിച്ചര് ലഭ്യമാക്കും. മാനസിക വെല്ലുവിളി നേരിടുന്ന കുട്ടികള്ക്ക് സ്കോളര്ഷിപ്പിനായി 22 ലക്ഷം രൂപ, 16 ശ്മശാനങ്ങള്ക്ക് 13 ലക്ഷം രൂപ വീതം എന്നിങ്ങനെയും പുതിയ പദ്ധതികള്ക്ക് ഫണ്ട് വിലയിരുത്തി. പ്രസിഡണ്ട് ചെയര്മാനായി വിദഗ്ധരടങ്ങിയ ജില്ലാ പഞ്ചായത്തിന്റെ ആസൂത്രണ സമിതിയും രൂപീകരിച്ചു. ജില്ലാ പഞ്ചായത്ത് സെക്രട്ടറി കണ്വിനറും ആസൂത്രണ സമിതി വിദഗ്ധാംഗം കെ.വി.ഗോവിന്ദന് വൈസ് ചെയര്മാനുമാണ്. സ്റ്റാന്റിങ്ങ് കമ്മിറ്റി ചെയര്മാന്മാര് 5 വിദഗ്ധാംഗങ്ങള് എന്നിവരും സമിതിയിലുണ്ട്.
+വൈസ് പ്രസിഡന്റ് പി.പി.ദിവ്യ, ക്ഷേമകാര്യ സ്റ്റാന്റിംഗ് കമ്മറ്റി ചെയര്പേഴ്സണ് ടി.ടി.റംല, ആരോഗ്യവിദ്യാഭ്യാസ സ്റ്റാന്റിംഗ് കമ്മറ്റി ചെയര്മാന് കെ.പി.ജയബാലന് മാസ്റ്റര്, വികസനകാര്യ സ്റ്റാന്റിംഗ് കമ്മറ്റി ചെയര്മാന് വി.കെ.സുരേഷ് ബാബു, പൊതുമരാമത്ത് സ്റ്റാന്റിംഗ് കമ്മറ്റി ചെയര്ഴ്സണ് കെ.ശോഭ, ജില്ലാപഞ്ചായത്ത് സെക്രട്ടറി (ഇന് ചാര്ജ്ജ്) വി.കെ.രാജന്, പദ്ധതി നിര്വഹണ ഉദ്യോഗസ്ഥര് എന്നിവരും യോഗത്തില് സംബന്ധിച്ചു.
