ന്യൂദല്ഹി: റെയില്ബജറ്റ് ലയിപ്പിച്ചുകൊണ്ടുള്ള ആദ്യപൊതുബജറ്റ് ഫെബ്രുവരി 1ന് കേന്ദ്രധനമന്ത്രി അരുണ് ജെയ്റ്റ്ലി പാര്ലമെന്റില് അവതരിപ്പിക്കും. ആദായ നികുതി പരിധി രണ്ടര ലക്ഷത്തില് നിന്നും മൂന്നരലക്ഷമാക്കി ഉയര്ത്തിയേക്കും.നോട്ട് നിരോധനവും ചരക്കുസേവന നികുതിയും ജനക്ഷേമ ബജറ്റിലൂടെ ജനങ്ങളിലെത്തിക്കാനാകുമെന്നാണ് കേന്ദ്രസര്ക്കാരിന്റെ പ്രതീക്ഷ.
നോട്ട് നിരോധനത്തെ തുടര്ന്ന് രാജ്യത്തിന്റെ വളര്ച്ചാ നിരക്കില് അനുഭവപ്പെട്ട ചെറിയ ഇടിവ് മറികടക്കുന്നതിനുള്ള പ്രഖ്യാപനങ്ങളും നടപടികളും ബജറ്റിലുണ്ടാകുമെന്ന് സാമ്പത്തിക വിദഗ്ധര് കരുതുന്നു. നോട്ട് നിരോധനം കാര്യമായി ബാധിച്ച റിയല് എസ്റ്റേറ്റ്, ഓട്ടോമൊബൈല് മേഖലകള് ബജറ്റില് ഇളവുണ്ടാകുമെന്ന പ്രതീക്ഷയിലാണ്. പരോക്ഷ നികുതിയില് വലിയ ആശ്വസമാകുമെന്ന് പ്രതീക്ഷിക്കപ്പെടുന്ന ജിഎസ്ടിയും ബജറ്റിന്റെ പ്രതീക്ഷകള് വര്ദ്ധിപ്പിക്കുന്നുണ്ട്.
നികുതി നിരക്കുകളില് കാര്യമായ കുറവുണ്ടാകുമെന്നാണ് ഏവരും പ്രതീക്ഷിക്കുന്നത്. കോര്പ്പറേറ്റുകളും നികുതി ഇളവ് പ്രതീക്ഷിക്കുന്നുണ്ട്. നിലവില് 25 ശതമാനമാണ് നികുതി. ഇതില് ഒന്നര ശതമാനം വരെ ഇളവുണ്ടായേക്കും. പണരഹിത ഇടപാടുകളിലേക്ക് രാജ്യം കൂടുതലായി കടന്ന സാഹചര്യത്തില് ഇത്തരം ഇടപാടുകള്ക്ക് ഈടാക്കുന്ന സേവന നിരക്കില് വലിയ കുറവ് വരുത്തേണ്ട സാഹചര്യവുമുണ്ട്. മുതിര്ന്ന പൗരന്മാരുടെ പെന്ഷന് പദ്ധതിയെ പൂര്ണ്ണമായും നികുതി വിമുക്തമാക്കുന്ന പ്രഖ്യാപനത്തിന് സാധ്യതയുണ്ട്.
മുഖ്യമന്ത്രിമാരുടെ സമിതിയുടെ ശുപാര്ശകളിലും അനുകൂല നടപടികള് പ്രതീക്ഷിക്കുന്നു.
ആദായ നികുതി പരിധി ഉയര്ത്തുന്നതോടൊപ്പം സ്ഥിര നിക്ഷേപങ്ങള്, ഇന്ഷുറന്സ് പ്രീമിയം, മ്യൂച്ചല് ഫണ്ടുകള് എന്നിവ വഴി കൂടുതല് നികുതി ഇളവുകളും പ്രഖ്യാപിച്ചേക്കും. ജനങ്ങളുടെ പക്കലുള്ള അധിക പണം സാമ്പത്തിക മേഖലയില് വിനിയോഗിക്കാനുള്ള പ്രോത്സാഹനമാകുമിത്.
റെയില്വേ ബജറ്റും പൊതുബജറ്റില് ഉള്പ്പെടുത്തിക്കൊണ്ടുള്ള പ്രഖ്യാപനങ്ങളാണ് കേന്ദ്രധനമന്ത്രി നടത്തുക, റെയില് സുരക്ഷാ ഫണ്ടിലേക്ക് 1.20 ലക്ഷം കോടി രൂപ കണ്ടെത്തുന്നതിന് യാത്രാനിരക്കില് പ്രത്യേക സെസ് ഉള്പ്പെടുത്താന് സാധ്യതയുണ്ട്. ഓഹരി വ്യാപരത്തിനുള്ള സെക്യൂരിറ്റി ട്രാന്സാക്ഷന് നികുതി കുറയ്ക്കാനും കേന്ദ്രധനമന്ത്രി പ്രഖ്യാപനം നടത്തിയേക്കും.
ജനുവരി 31നാണ് ബജറ്റ് സമ്മേളനം ആരംഭിക്കുന്നത്. ചൊവ്വാഴ്ച പാര്ലമെന്റിന്റെ ഇരുസഭകളെയും രാഷ്ട്രപതി പ്രണബ്മുഖര്ജി അഭിസംബോധന ചെയ്ത് നയപ്രസംഗം നിര്വഹിക്കും. ബജറ്റ് സമ്മേളനത്തിന്റെ ആദ്യഘട്ടം ഫെബ്രുവരി 9ന് സമാപിക്കും. രണ്ടാംഘട്ടം മാര്ച്ച് 9 മുതല് ഏപ്രില് 12 വരെ ചേരും.
