തിരുവനന്തപുരം: സംസ്ഥാന സര്ക്കാരിലെ വിവിധ വകുപ്പുകളെ ഏകോപിപ്പിച്ച് ഭരണം മുഖ്യമന്ത്രിയുടെ കൈപ്പിടിയില് ഒതുക്കാന് നീക്കം. വിവിധ വകുപ്പുകളിലെ ഫയല് നീക്കം വേഗത്തിലാക്കാനും വിവിധ പദ്ധതികളുടെ നിരീക്ഷണം നടത്താനും എന്ന പേരില് ആരംഭിക്കുന്ന പുതിയ ഡേറ്റാ ഡ്രിവണ് സംവിധാനത്തിലൂടെയാണ് മുഖ്യമന്ത്രി വി.ഡി. സതീശന് വിവിധ വകുപ്പുകളുടെ നിയന്ത്രണം തന്റെ കൈപ്പിടിയില് ഒതുക്കുന്നത്.
ഇന്നലെ നടന്ന കാബിനറ്റ് യോഗത്തിലാണ് ഇതുസംബന്ധിച്ച തീരുമാനം ഉണ്ടായത്. സെക്രട്ടേറിയറ്റില് പൊതുഭരണ വകുപ്പിന്റെ കീഴില് ഒരു ബിസിനസ് പോളിസി ആന്ഡ് പ്രോസസ്സ് റീഎഞ്ചിനീയറിങ് സെല് തുടങ്ങിക്കൊണ്ടാണ് ഇതിനുള്ള പ്രാരംഭ നടപടികള് ആരംഭിക്കുന്നത്. പദ്ധതികളുടെ നടത്തിപ്പ് വൈകുന്നതു മൂലം കോടിക്കണക്കിനു രൂപ സംസ്ഥാനത്തിനു നഷ്ടമാകുന്നെന്നും അതുപരിഹരിക്കാനാണ് പുതിയ സംവിധാനമെന്നും മുഖ്യമന്ത്രി പറഞ്ഞു. അതാത് വകുപ്പുകളിലും മുഖ്യമന്ത്രിയുടെ ഓഫീസിലും ചീഫ് സെക്രട്ടറിയുടെ ഓഫീസിലും എല്ലാം ഓരോ ഫയലിന്റെയും തല്സ്ഥിതി അറിയുന്നതിനുവേണ്ടിയുള്ള പുതിയ സംവിധാനമാണ് നടപ്പിലാക്കുന്നത്. വിവിധ വകുപ്പുകളുടെ കീഴില് സംസ്ഥാനത്തുടനീളം നടക്കുന്ന പദ്ധതികളുടെ രൂപരേഖ തയ്യാറാക്കും. സര്ക്കാര് പദ്ധതികള്ക്ക് പ്രോട്ടോക്കോള് വരും. ഇതുവഴി പദ്ധതി നടത്തിപ്പിലെ കാലതാമസത്തിനും അധിക ചെലവിനും നിയന്ത്രണമുണ്ടാകുമെന്നും മുഖ്യമന്ത്രി പറഞ്ഞു. ഇതോടെ എല്ലാ ഫയലുകളും മുഖ്യമന്ത്രിയുടെ ഓഫീസ് വഴി എത്തിയതിനു ശേഷമായിരിക്കും അന്തിമ തീരുമാനം എടുക്കുക.
