ആലപ്പുഴ: ജില്ലയിലെ വിവിധ എംപ്ലോയ്മെന്റ് എക്സ്ചേഞ്ചുകളില് രജിസ്റ്റര് ചെയ്തവരുടെ പട്ടികയില് ഒമ്പതു തസ്തികയില് ആവശ്യത്തിനുള്ള ഉദ്യോഗാര്ത്ഥികളില്ല. എന്നാല് മെട്രിക്കിനു താഴെ യോഗ്യതയുള്ള 10 തസ്തികയ്ക്ക് രജിസ്റ്റര് ചെയ്തവരുടെ എണ്ണം ആവശ്യത്തിനേക്കാള് കൂടുതലുമാണ്. ആയുര്വേദ, ഫാര്മസിസ്റ്റ്, ബോട്ട് ഡ്രൈവര്, ബോയിലര് അറ്റന്ഡന്റ്, ജനറല് ഹൈജിനിസ്റ്റ് ഡ്രാഫ്ട്സ്മാന് മെക്കാനിക്കല്, ഹോമിയോ ഫാര്മസിസ്റ്റ്, ലൈവ്സ്റ്റോക്ക് ഇന്സ്പെക്ടര്, മെഡിക്കല് റെക്കോര്ഡ്സ് ലൈബ്രേറിയന്, സിറാങ് എന്നീ തസ്തികകളിലേക്കുള്ള ഉദ്യോഗാര്ഥികളുടെ എണ്ണത്തിലാണ് കുറവ് കാണുന്നത്. 2016ലെ വാര്ഷിക എംപ്ലോയ്മെന്റ് മാര്ക്കറ്റ് റിപ്പോര്ട്ട് പ്രകാരമുള്ള കണക്കാണിത്.
മെട്രിക്കിനു താഴെ, ക്ലര്ക്ക്, കമ്പ്യൂട്ടര് സര്ട്ടിഫിക്കറ്റുള്ളവര്, ഡ്രൈവര് ഹെവി, എല്എംവി, ബിരുദധാരികള്, മട്രിക്കുലേറ്റ്സ്, പ്രീഡിഗ്രി, പ്ലസ്ടൂ, എച്ച്എസ്ഇ, സ്വീപ്പര്, ടൈപ്പിസ്റ്റ് യോഗ്യതയുള്ളവര് പട്ടികയില് ആവശ്യത്തിലെറെയാണെന്ന് റിപ്പോര്ട്ട് പറയുന്നു.
സ്വകാര്യ മേഖലയില് വനിത ജീവനക്കാരുടെ എണ്ണം 2015നെ അപേക്ഷിച്ച് ഉയര്ന്നിട്ടുണ്ട്. 2015 മാര്ച്ചില് സ്വകാര്യമേഖലയില് 2,663 വനിതകള് ജോലി ചെയ്തിരുന്ന സ്ഥാനത്ത് 2016ല് 26,578 ആയി ഉയര്ന്നു. പൊതുമേഖലയില് 2015ല് 9,991 വനിതകളാണ് ഉണ്ടായിരുന്നതെങ്കില് 2016ല് ഇത് 10,033 ആയി ഉയര്ന്നു. പൊതു-സ്വകാര്യ മേഖലയിലായി 2016ല് 36,791 വനിതാ ജീവനക്കാരാണുള്ളത്.
2015 മാര്ച്ചില് പൊതു – സ്വകാര്യ മേഖലയിലായി ആകെ 71,022 ജീവനക്കാരുണ്ടായിരുന്നത് കഴിഞ്ഞ മാര്ച്ചില് 71,259 ആയി ഉയര്ന്നു. 2015ല് പൊതുമേഖലയില് 25,447 ജീവനക്കാരുണ്ടായിരുന്നത് കഴിഞ്ഞ മാര്ച്ചില് 25,535 ആയപ്പോള് സ്വകാര്യമേഖലയിലിത് 45,575 ല് നിന്ന് 45,724 ആയും ഉയര്ന്നു. ജീവനക്കാരുടെ രജിസ്റ്ററുമായി ബന്ധപ്പെട്ട് വകുപ്പ് 1,859 സ്ഥാപനങ്ങള്ക്കാണ് ചോദ്യാവലി അയച്ചത്.
ഇതില് 95.48 ശതമാനം സ്ഥാപനങ്ങളും അതായത് 1,775 എണ്ണവും പ്രതികരണമറിയിച്ചു. പൊതുമേഖലയില് 678 സ്ഥാപനങ്ങളും സ്വകാര്യ മേഖലയില് 1,097 സ്ഥാപനങ്ങളും ഇത്തരത്തില് പ്രതികരണമറിയിച്ചവയാണ്.
